🔊 ये सीख ला सुनव

सियान मन के सीख ला माने मा ही भलाई हे। संगवारी हो तइहा के सियान मन कहय-बेटा! मंजूरपहरी हर मंजूर के गांव आय रे। फेर हमन नई मानन। वि.खं.-बिल्हा, जिला-बिलासपुर के गांव सीपत ले लगभग 18 कि.मी. के दूरी में एक ठन गांव हवै मंजूरपहरी । ए गांव के नाम मंजूरपहरी कइसे परिस ए बारे मा जानकारी मिलस ए गांव के सरपंच श्री मती रमौतिन बाई पति श्री राम नेताम से। ए गांव मा जइसे प्रवेश होथे हमन ला एक सुघ्घर पहाड़ी मिलथे जउन ला दुरिहा ले देखे मा अइसे लगथे जइसे कोनो मंजूर बइठे हावय अउ ए पहाड़ी हर वास्तव में मंजूर मन के गढ़ आय। ए गांव के सियान मन बताथें कि तइहा जमाना में हमन बइठे रहन अउ कई ठन मंजूर मन ए पहाड़ी ले उतर के हमर तिर मा किंजरय। आज घलाव कभू-कभू मंजूर मन उतर के नीचे आथे फेर अब उॅखर संख्या धीरे-धीरे कम होवत जात हे। सुन के थोरकन दुख होइस के आज काबर इंखर संख्या कम होवत जात हे? संगवारी हो ए गांव हर पूर्ण रूप से प्रकृति के कोरा में बसे हे।

ए गांव के सुन्दरता देखते बनथे अउ ए गांव ला अतका अच्छा सरपंच मिले हावय जउन हर ए गांव के साफ-सफाई करे बर स्वयं बहरी धर के भिड़ जाथे। ए हर कानो सुने बात नोहय बल्कि आॅखी ले देखे बात हरै। महूॅ ला एक घंव उॅखर संग मा गांव के हर गली खोर मा घूमें के मौका मिलिस तब हमू मन अपन स्कूल के जम्मों लइका मन ला लेके प्राथमिक, पूर्व माध्यमिक अउ हाई स्कूल के जम्मों शिक्षक साथी मन के संग मा जम्मों गांव के घर-घर जाके स्वच्छता संबंधी जानकारी स्वच्छ पानी अउ शौचालय के जानकारी देके आय रहेन। पूरा गांव ला घूम के आत्मा आनंदित हो गै रहिस हे। ए गांव के कोनो गली में गंदगी तो नजर में ही नई आत रहिस हे। ए गांव ला जउन बसाय हवै तउन परिवार के महतारी ले जरूर भेंट होइस। ए गांव के एक ठन अउ बात में मोर अंतस हर द्रवित हो उठिस- जब हमन 26 जनवरी के दिन बिहनिया प्रभात फेरी बर निकलेन। लइकन मन आगू-आग महात्मा गांधी, भारत माता के अउ माता सरस्वती के फोटो ल लेके अउ तिरंगा झंडा लेके फेरी लगाथे तब हर गली में दाई बहिनी मन गंगाजल अउ दूध से वो लइकन मन के पांव पखारथे।

ए गांव के हर लइका अउ सियान के मन में भारत भुइंया बर अतका प्रेम अउ समर्पन देख के आत्मा भावविभेार हो गे। ए गांव के सरपंच श्री राम नेताम जी ला गांव के एक झन दिव्यांग बेटी बर शौचालय बनवाय खातिर एनडी टीवी इंडिया में बुला के महान कलाकार अमिताभ बच्चन के द्वारा सम्मानित घलाव किये जा चुके हे। अइसे नई हे कि ए काम ला उमन कोनो ईनाम पाए खातिर करे रहिन हे बल्कि आज भी दोनो पति-पत्नि के मन में हमनला पूरा गांव अउ हमर देस के खातिर प्रेम अउ समर्पन देखे बर मिलिस। केवल सरपंच ही नई ए गांव के जम्मों निवासी मन के मन हर बहुॅत ही पावन नजर आइस। इंहा के लइकन मन के मन हर घलाव वइसने निश्छल अउ सेवाभाव अउ अतिथि सत्कार के भाव ले भरे नजर आइस।

ए गांव में जायके बाद मनखे ला शहर के धुर्रा अउ गंदगी छू भी नई पावय। शुद्ध प्राकृतिक हवा अउ पानी वाला पहाड़ी के नीचे बसे हरियर गांव हरै मंजूरपहरी। पहरी के मतलब होथे पहाड़ी अउ पहाड़ी में मंजूर पाए के सेती ए गांव के नाम मंजूरपहरी रखे गे हावय। संगवारी हो दुनिया भर में सब ले सुन्दर पक्षी मंजूर ला माने जाथे। मंजूर ला पक्षी मन के राजा घलाव कहे जाथे। मंजूर के सिर उपर राजा के मुकुुट सहीं सुघ्घर कलगी घलाव होथे। नर मंजूर के कई ठन अति सुघ्घर लंबा-लंबा पाखी होथे। मंजूर के पाखी में सुघ्घर आॅखी असन इंद्रधनुशी रंग के कई ठन निशान बने रइथे जउन हर सबके मन ला मोह लेथे। अइसे लगथे के कोनो बहुॅत बडे़ कलाकार हर एखर पाखी के सजावट करे हावय तभे तो भगवान कृश्ण हर घलाव अपन सिर में मंजूर के पाखी ला धारण करे हावय।

वइसे तो मंजूर हर ज्यादातर अपन पाखी ला नई फइलावय फेर बसंत ऋतु अउ बरसात के दिन में जब मंजूर हर खुश होके अपन जम्मों पाखी ला फइला के नाचथे तब ओखर सुंदरता देखते बनथे। एखर सुंदरता ला देखके हमर भारत सरकार हर 26 जनवरी सन् 1963 के एला राश्ट्रीय पक्षी घोशित करे हावय। मंजूर हर केवल भारत देस के ही नइ बल्कि श्री लंका के घलाव राश्ट्रीय पक्षी आय। एखर वैज्ञानिक नाम पावो क्रिस्टेटस हरै। एखर मूल स्थान दक्षिणी अउ दक्षिण पूर्वी एशिया हरै। मंजूर हर दक्षिण एशिया के देसी तितर परिवार के बड़का पक्षी आय। दुनिया के अउ दूसर भाग मेें मंजूर हर अर्धजंगली के रूप में परिचित हे। मंजूर हर खुला जंगल या खेत में पाए जाथे जिहाॅ उॅखर चारा बर अनाज मिल जाथे फेर मंजूर हर सांप, नपल्ली, मुसुवा अउ गिलहरी ला घलाव खाथे। जंगल में अपन तेज आवाज के कारन इंखर पता आसानी से लगाए जा सकथे। मंजूर हर शेर सहीं अपन शिकारी ला अपन उपस्थिति के पता घलाव देथे।

इमन जादातर अपन पैर मा चलथे अउ उडे़ से बचे के कोशिस करथे। मंजूर के पाखी से कई ठन सजावट के समान घलाव बनाए जाथे अउ कई ठन कुर्सी के डिजाइन घलाव मंजूर के पाखी कस बनाए जाथे। एखर पाखी के अड़बड़ महत्तम हावै जेखर बखान नई करै जा सकै। हमर छत्तीसगढ़ में पाए जाने वाला राजा पक्षी के संरक्षण के प्रयास हमर छत्तीसगढ़ सरकार द्वारा होना चाही। जइसे हमर छत्तीसगढ़ में मगर के संरक्षण बर पार्क बनाए गे हावय वइसने मंजूरपहरी में मंजूर के संरक्षण करके मंजूर पार्क बनाए जा सकथे। फेर कोनो भी हालत में ए गांव के प्राकृतिक रूप खतम नई होना चाही। आज 5 जून के विश्व पर्यावरण दिवस मनाए जाथे। आज विश्व पर्यावरण दिवस में मोर यही शुभकामना हावै कि मंजूरपहरी में मंजूर के संरक्षण जरूर होना चाही। जम्मों ग्रामवासी के घलाव यही प्रार्थना हावै। सियान बिना धियान नई होवय। तभे तो उॅखर सीख ला गठिया के धरे मा ही भलाई हावै। सियान मन के सीख ला माने मा ही भलाई हावै।

रश्मि रामेश्वर गुप्ता

The post मंजूर के गांव मंजूरपहरी : सियान मन के सीख appeared first on गुरतुर गोठ : छत्तीसगढ़ी (Chhattisgarhi).

🔊 ये खबर ला सुनव

परमसंत कबीर दास जी अईसन कलम के बीर हरे जे ह अपन समय के समाज म चलत धरम अउ जाति के भेदभाव, कुरीति, ऊंचनीच,पाखंड, छूवाछूत अउ आडंबर के बिरोध म अपन अवाज ल बुलंद करिस अउ समाज म समता लाय खातिर अपन पूरा जीवन ल लगा दीस । ओ समय म लोग-बाग मन एक तरफ तो मुस्लिम राजा मन के अत्याचार म त्रस्त राहय त दूसर तरफ हिंदू पंडित मन के कर्मकांड, पाखंड अउ छुवाछुत ले। वईसे तो कबीर दास जी ह पढ़े-लिखे बर नइ जानत रहिस हे, फेर वो ह जउन भी बोलय ओला ओकर सिस्य मन तूरते लिख के रख लय, उही ह आज हमर बर ओकर धरोहर हे।
कबीर दास जी के जनम के बारे म कई ठन बात पढ़े-सुने बर मिलथे, कोनो कहिथे- वो ह विधवा बम्हनीन के लईका रहिस हे जउन ह रामानंद जी के आसिरबाद ले होय रहिस हे जे ह विधवा ल सधवा नारी के धोखा म दे डरे रहिस हे, जेला वो विधवा बम्हनिन ह लोक लाज के डर म कांसी तीर के गांव लहरतारा के तरिया म छोड़ दे रहिस हे, जेला एकझन जुलाहा परवार ह पालीस हे। कोनो कहिथे वो ह मुसलमान लईका रहिस हे।अउ कबीरपंथी मन तो लहरतारा के तरिया के कमल फूल म अवतरे लईका हरे कहिथे। वईसने ओकर जनमकाल म घलो मतभेद हे, कोनो संवत् १४५५ कहिथे, त कोनो संवत् १४५१-५२ के बीच कहिथे । कबीर दास जी के बिहाव ह बैरागी कन्या ‘लोई’ संग होय रहिस हे, जेकर ले एक बेटा ‘कमाल’ अउ एक बेटी ‘कमाली’ होय रहिस हे । कबीरपंथी मन कहिथे के कबीर दास जी के बिहाव नइ होय रहिस हे, कमाल ओकर सिस्य अउ कमाली अउ लोई ओकर सिस्या रहिन हे ।
कबीर दास जी ह अपन आप ल जुलाहा मानय, एक जघा कहे घलो हे –
जाति जुलाहा नाम कबीरा बनि बनि फिरै उदासी ।
कबीर दास जी ह रामानंद जी ल अपन गुरू मानय, राम नाम के दिक्छा पाय के बाद कबीर दास जी ह हमेसा राम नाम जाप म डुबे राहय,
“पीवत राम रस लगी खुमारी”।
कबीर दास जी ह अपन समय म धरम म चलत पाखंड के बिरोध करके समाज ल बड़ झकझोरिस, जइसे:
पाहन पूजे हरि मिले तो मैं पूजूं पहाड़।
कांकर पाथर जोर के, मस्जिद लियो बनाय
ता चढ़ि मुल्ला बाग दे, क्या बहरा हुआ खुदाय।
मो को कहां ढूंढो बंदे, मैं तो तेरे पास में
न मैं बकरी न मैं भेंड़ी, न छूरी गंडास में
ना मैं देवल ना मैं मस्जिद, ना काबे-कैलाश में
न तो कौनों क्रियाकर्म में, नहिं जोग बैराग में ……
अईसने अपन बिरोधी मन ल कहिस के

मेरा तेरा मनवा कैसे एक होई रे
मैं कहता हौं आंखन देखि, तू कागद की लेखी रे
भगवान ल पाय खातिर का करना चाही, येकर बर अपन अनुभव ल साधु-समाज बर साझा करिस, जइसे
१, पिछे लागा जाइ था, लोक बेद के सांथ ।
आगे थे सतगुरू मिला, दीपक दिया हांथ ।।
२, मन रे जागत रहिये भाई ।।
गाफिल होई बसत मति खोवै, चोर मुसै घर जाई ।।
३, हम तो एक एक कर जाना।।
दोई कहै तिनही को दो-जख, जिन नाहिन पहिचाना ।। …
कबीर दास जी के उलटबांसी ह घलो बड़ परसिद्ध होईस, जईसे
एक अचंभा मैंनें देखा नदिया लागी आग।
अंबर बरसै धरती भीजै, यहु जाने सब कोई।
धरती बरसै अंबर भीजै, बूझे बिरला कोई।।
गावनहारा कदे न गावै, अनबोल्या नित गावै।
नटवर पेखि पेखना पेखै, अनहद बेन बजावै।। …..
धरम के नाव म लड़ईया मन बर कबीर दास जी कहिस
एकै पवन एक ही पानी, एक जोति संसारा।
एक ही खाक धड़े सब भांडे, एक ही सिरजनहारा।।…
संसार के असारता बर घलो कबीर दास जी कहिस के
रहना नहि देस बिराना हे।
यह संसार कागद की पुड़िया, बूंद परे घुल जाना है।
यह संसार कांट की बाड़ी, उलझ उलझ मरि जाना है।
यह संसार झार और झांखर, आग लगे बरि जाना है। …
कबीर दास जी ह अपन जिनगी के पूरा समय ल कांसी म बितईस अउ अाखरी समय ल मगहर म बितईस, काबर के ओ समय ये कहे जाय के कांसी म जउन भी मरथे वो ह मुक्ति पाथे, अउ मगहर म जउन मरथे वो ह वो घोर नरक भोगथे, ये भरम ल टोरे खातिर कबीर दास जी ह मगहर म मरना पसंद करिस।
कबीर दास जी ल हिंदु-मुसलमान दुनों मन अपन जाति के मानय, त कहे जाथे के जब कबीर दास जी ह अपन सरीर ल छोड़िस त ओकर सरीर के जघा म बहुत अकन फूल मिलीस, जेला हिंदु मुसलमान दुनो मन बांट लिन अउ अपन अपन रीत के मुताबिक माटी दीन।
कबीर दास जी के महिमा के बखान नइ करे जा सकय, समाज म समता लाय खातिर वो ह अपन पूरा जिनगी ल लगा दिस, संगेसंग भगवान ल कईसे पाय जा सकत हे, ओकर रद्दा बतईस। आवव ओकर जनमदिन म हमन कसम खईन के समाज म समता भाव ल रखबोन अउ
बुरा जो देखन मैं चला बुरा न मिलिया कोय।
जो दिल खोजा आपना, मुझसा बुरा न कोय।।
इही भाव ल संग रख के हमन अपन अवईया जिनगी ल बितईन।

ललित वर्मा “अंतर्जश्न”
छुरा

The post कबीर जयंती : जाति जुलाहा नाम कबीरा बनि बनि फिरै उदासी appeared first on गुरतुर गोठ : छत्तीसगढ़ी (Chhattisgarhi).

हमर देश में छत्तीसगढ़ के अलग पहिचान हे। इंहा के संस्कृति, रिती रिवाज, भाखा बोली, मंदिर देवाला, तीरथ धाम, नदियां नरवा, जंगल पहाड़ सबके अलगे पहिचान हे।
हमर छत्तीसगढ़ में कोनों चीज के कमी नइहे। फेर एकर सही उपयोग करे के जरुरत हे। इंहा के परयटन स्थल मन ल विकसित करे के जरुरत हे।
बहुत अकन परयटन स्थल के विकास अभी भी नइ होहे। जब तक सरकार ह एकर ऊपर धियान नइ दिही तब तक एकर विकास नइ हो सके।
कबीरधाम जिला में एक जगा हे भोरमदेव एला छत्तीसगढ़ के खजुराहो भी कहे जाथे। काबर कि जइसे खजुराहो के मंदिर में चित्रकला उकेरे गेहे ओइसने चित्रकला इंहा के मंदिर में भी देखे बर मिलथे।
भोरमदेव ह कवर्धा से 17 कि. मी. दूर घना जंगल के बीच में स्थापित हे।इंहा जाय बर पक्की सड़क बन गेहे अऊ मोटर गाड़ी के बेवस्था घलो हे। आजकाल जंगल भी कटा गेहे त जंगली जानवर के उतना डर नइहे ।
पहिली के सियान मन बताथे कि भोरमदेव के तीर में जाय बर आदमी मन डरराय। काबर कि उंहा घनघोर जंगल रिहिसे अऊ जंगली जानवर शेर भालू के डेरा रिहिसे। अब मनखे के आना जाना बाढ़गे अऊ जंगल ह कटागे त जानवर मन के भी अता पता नइ चले।
प्राचीन मंदिर — भोरमदेव मंदिर ह बहुत प्राचीन मंदिर हरे। मंदिर के अंदर में शिवलिंग स्थापित हे। इंहा के मूरतीकला अऊ सुंदरता ह देसभर में परसिद्ध हे।
एहा जैन, वैष्णव, शैव सबो मत के आदमी के तीरथधाम हरे। इंहा सब परकार के मूरती लगे हुए हे।
ये मंदिर ल नागवंशी राजा देवराय ह 11 वीं सताब्दी में बनवाय रिहिसे।

भोरमदेव नाम कइसे परीस — भोरमदेव नाम के पिछे कहे जाथे कि गोंड राजा मन के देवता शिवजी हरे, जेला बूढ़ादेव, बड़ेदेव अऊ भोरमदेव भी कहे जाथे । एकरे सेती एकर नाम भोरमदेव परीस ।

कला शैली — मंदिर के मुंहू पूर्व दिसा के डाहर हे। ए मंदिर ह नागर सैली के सुंदर उदाहरन हरे। मंदिर में तीन तरफ से परवेस करे जा सकथे। एला पांच फूट ऊंचा चबूतरा में बनाय गेहे। अइसने मंदिर बहुत कम देखे बर मिलथे।
मंडप के लंबाई ह 60 फूट अऊ चौड़ाई ह 40 फूट हे। मंडप के बीच में चार खंभा अऊ किनारे में 12 खंभा बनाय गेहे। जेहा मंदिर के छत ल सम्हाल के रखे हे। सब खंभा में बहुत ही सुंदर चित्र बनाय गेहे।
मंडप में लछमी बिसनु अऊ गरुड़ के मूरती रखे गेहे। भगवान के धियान में बइठे एक राजपुरुस के मूरती भी रखे हुए हे।

गर्भगृह — मंदिर के गर्भगृह में बहुत अकन मूरती रखे गेहे अऊ एकर बीच में शिवलिंग स्थापित करे गेहे।
पंचमुखी नाग अऊ गनेस जी के मूरती भी रखाय हे।

बाहरी दीवार — मंदिर के चारो डाहर बाहरी दीवार में शिव, चामुंडा, गनेस, लछमी, बिसनु, वामन अवतार आदि के मूरती लगे हुए हे।

मड़वा महल — भोरमदेव मंदिर से एक किलोमीटर के धुरिहा में एक ठन अऊ शिव मंदिर हे जेला मड़वा महल या दूल्हा देव मंदिर के नाम से जाने जाथे।
ए मंदिर के निरमान ल 1349 ई. में फनी नागवंशी शासक राजा रामचंद्र देव करवाय रिहिसे।
कहे जाथे ए मंदिर के निरमान ल अपन बिहाव के उपलक्छ में करवाय रिहिसे। माने ओकर बिहाव ह इही जगा में होय रिहिसे।
मड़वा के मतलब होथे मंडप। जेला बिहाव के समय में बनाय जाथे। स्थानीय बोली में एला मड़वा कहे जाथे। एकरे पाय एला मड़वा महल के नाम से जाने जाथे।
मड़वा महल के बाहरी दीवार में 54 ठन कामसूत्र के मूरती उकेरे गेहे। एकर माध्यम से समाज में स्थापित गृहस्थ जीवन के अंतरंगता ल दरसाय गेहे।

छेरकी महल — भोरमदेव मंदिर के दक्षिन पश्चिम दिशा में एक किलोमीटर के धुरिहा में एक अऊ मंदिर हे जेला छेरकी महल के नाम से जाने जाथे। ए मंदिर के निरमान भी फनी नागवंशी राजा के शासन काल में होहे।
अइसे बताय जाथे कि ए मंदिर के निरमान ल बकरी चरवाहा मन के लिये बनाय गे रिहिसे। ताकि बकरी चरात चरात इंहा बइठ के सुरता सके।
छत्तीसगढ़ी में बकरी ल छेरी कहे जाथे। एकरे पाय ए महल के नाम छेरकी महल परे हे।

भोरमदेव महोत्सव — भोरमदेव के विकास करे बर सरकार ह हर संभव परयास करत हे। इंहा के सुंदरता ल बढ़ाय खातिर अऊ परयटक मन ल आकरसित करे बर चैत मास में भोरमदेव महोत्सव के भी आयोजन करे जाथे। जेमे छत्तीसगढ़ अऊ बाहिर के कलाकार मन ह आके अपन कला के परदरसन करथे।

आवासीय सुविधा — इंहा परयटक मन के लिए रुके के भी बेवस्था करे गेहे। लोक निरमान विभाग ह विसराम घर भी बनाहे ।जिला मुख्यालय कवर्धा में भी विसराम घर, होटल अऊ लाज के बेवस्था हे।

पहुंचे के रास्ता — भोरमदेव रायपुर से 135 किलोमीटर के दूरी में हे। दुरुग भिलाई से भी लगभग ओतकीच धुरिहा परही।
इंहा जाय बर पक्की सड़क अऊ यात्री बस के सुविधा हे।

महेन्द्र देवांगन “माटी”
गोपीबंद पारा पंडरिया
जिला – कबीरधाम (छ. ग)
पिन- 491559
मो.- 8602407353
Email -mahendradewanganmati@gmail.com

The post भोरमदेव – छत्तीसगढ़ के खजुराहो appeared first on गुरतुर गोठ : छत्तीसगढ़ी (Chhattisgarhi).

आज के समे म कोनो ककरो नई होवय तईसे लागथे,मनखे के गोठ बात बिना सुवारथ के दूसर मनखे नई सुनय I अऊ बात बने सही रईहीं तभो वोकर बात ल कोनों नई गुनय, भाई मन बाटें भाई परोसी होगे हे, एक दूसर बर बईरी का कहिबे एक दूसर ल फूटे आँखी नई सुहावय Iसमे बदल गेहे अऊ मनखे मन बदल गेहे फेर ईतवारी बड़ा के मंझिला लईका मालचु ह नई बदलीच, भागमभाग अऊ बयसायीकरन के पल्ला दौड़ म लोगन मन अंधिरियागे हे फेर ईतवारी के संसकार ह मालचु ल अईसे जकड़े हाबय मरत ले नई छुटय तईसे लागथे I जात के केंवट ईतवारी ह एक समे म हमरे घर कमईया लगय, सात झिन लईका ल बनी भूति करके पालिस पोसिस सबो लईका अपन अपन रोजी रोटी कमाय बर धर लिच, बर बिहाव होगे नाती नतुरा आगे, तभो ले हमर घर के देहरी ल मरत ले नई छोड़ीस I ओकर मया अऊ बिसवास ल देखौ त अईसे लागय इही ह हमर घर परवार के सहिंच म हितवा ये,ईतवारी के गुजरे के बाद ओकर मंझिला लईका मालचु ह हमरे घर बनी भूति करय अऊ अपन परवार ल चलावय एको झिन लोग लईका नई रहिस हे, वोकर बाई सोहदरा ह तको काम म हाथ बटावयI जेन दिन काम नई रहय तेनो दिन हमर घर सोरियावत आवय अपन ठेठ भाखा म मोर महतारी ल बोलतीच गौटनीन कोनो काम होही त बतावव, ईहा के काम ल पहिली करके दूसर जगा जातेव, मोर महतारी ह एक बार वोला जरूर गरियातिस,आगेच जिवलेवा गतर के, जा जेन काम अपन आँखी में दिखत हे उही ल सिरहोI रोजे रोज मालचु के बेगारी काम करई हमर घर वोला बने लागय, वो काहय तको इहाँ के काम करे बिना मोर खाना नई पचय गौटनीन कईके,मोला देखके अइसने लागय कि आज के समे मा अईसन मनखे तको होथे का ? का सुख, का दुख,छट्टी बरही,बर बिहाव, जेने मेर देखव अगुवा असन मालचु ल खड़े पावव,बिना सुवारथ के आज कोनो ककरो नई सुनय, भाई भाई के नई बनय, बेटा अऊ बाप के नई जमय वोकर मन बर मालचु ह आज के समे में एक तमाचा आय,मालचु मया के नाव ये,मालचु एक बिसवास ये,मालचु ल भले ओकर बाई ह, गाव के मनखे ह परबुधिया काहय फेर ओकर सेवा भाव के गांठ ह अतेक ठोस लगहा हे आज भी कोनो तोड़ नई सकीच I कोन माटी के बने हे परबुधिया ह,आज घर परवार म हरर कटर होवत हे एक दूसर के टांग खिचत हे, दूसर के फटे खीसा देख हँसत हे, चारी चुगली म बूड़े हे,वोकर ले बढिया मोर परबूधिया भैय्या मालचु के काम अऊ ओकर बात ह हम सबो झीन बर प्रेरणा लगथेI वो कहिथे काकर बर अतेक संसों करथस माटी के काया माटी म जाही, लिंगरी लाई म बूड़ के जांगर ल अपन खपाव झन,मित मिलही मितान मिलही, कतको झीन सियान मिलही,फेर सरग चढ़े बर निसैनी नईये,जिनगी ल नरक बनाव झन I त परबूधिया फेर काहत हौ, बईरी के तै हितवा बन, मीत मितान बर मितवा बन, कोड़ात हाबस अपनेच बर गड्ढा,अईसन झन तेंहा परबूधिया बनI वाह ग मालचु भैय्या तोर गोठ अऊ काम ह घर परवार अऊ गाव बर हितवा असन लागथे,तै भले परबूधिया होबे फेर हमर मन के सही मायने म हितवा अस तोर जईसे हितवा रईही त कतको ले बड़े से बड़े पहार असन बाधा ल पार कर सकबो हमर भाग मानी ये कि तोर जईसे हितवा के साथ मिले हे I

विजेंद्र वर्मा अनजान
नगरगाँव (जिला-रायपुर)

The post हमर भाग मानी ये तोर जईसन हितवा हे appeared first on गुरतुर गोठ : छत्तीसगढ़ी (Chhattisgarhi).

आइगे बरात गांव-तीर भोला बाबा जी के
देखे जाबो चल गीयॉं संगी ल जगाव रे
डारो टोपि, मारो धोति, पॉंव पयजामा कसि
गरगल बांधा अंग कुरता लगाव रे

हेरा पनही, दौड़ंत बनही कहे नरसिंहदास
एक बार छूंहा करि सबे कहूँ धाव रे

पहुँच गये सुक्खा भये देखि केंह नहिं बाबा
नहिं बब्बा कहे प्राण ले अगाव रे

कोऊ भूत चढ़े गदहा चढ़े कूकूर म चढ़े
कोऊ-कोऊ कोलिहा म चढि़ आवत
कोऊ बिघवा म चढि़ कोऊ बघवा म चढि़
कोऊ घुघुवा म चढि़ हाँकत-उड़ावत
सर्र-सर्र सांप करे गर्र-गर्र बाघ रे

हॉंव-हॉंव कुत्ता करे कोलिहा हुहावत
भूत करे बम्म-बम्म कहे नरसिंहदास
संभू के बरात देखि जियरा डेरावत,
अस्‍पष्‍ट ….

नरसिंह दास वैष्‍णव

The post नरसिंह दास वैष्‍णव के शिवायन के एक झलक appeared first on गुरतुर गोठ : छत्तीसगढ़ी (Chhattisgarhi).

हमर गाव जुनवानी
के माटी मुडमिंजनी
चिटिक सुन लव संगी
डहर चलती एकर कहनी
आधातेच प्रसिद्ध पथरा- माटी हवे
शोर अडताफ म भारी उडथे
अचरुज हे पथरा मन के कथा
गांव म जे मुह ते सुनले गजब गाथा
अभी तो सुनव माटी के महिमा
पांच किसिम के हवे करिश्मा
कन्हार -दोमट हवे मटासी
लाल मुरम अउ पिवरी छुही
ऊपजे धान कत्कोन ओन्हारी
जाके देखव मंदिर अस खरही
चुंगडी-बोरा भरके गौतरिहा मन
अपन-अपन घर ले जाथे
माटीच लेगे बर जेठ बैसाख म
घरोघर सगा मन आथे
दही म रातभर भिंजो के
बिहने बदन अउ मुड म लगा
गरमी उतर जाही संगी
एक बार तो अजमा
आठो अंग संग चुन्दी चमकही
साबुन शेम्पू ह येकर संग का सकही
लीम तेल डार त जुआ लिख नसाही
धाव फोरा फुंसी सदा दिन बर नंदाही
हर्रा डार सरो के लिपथे
सुध्धर अंगना परछी भिथिया
पिडुरी, दुधही छुही संग
सजथे सुध्धर घर -कुरिया
मुड मिंजनी माटी के सेती
हमरे भर्री परे हे परती
दादी संतवन्तीन कहे चाहे बनाहु धनहा
तभो ले राखे रहु एला धरखनहा
सिरतोन हवन हमन भागमानी
सुध्धर नानकन गाव पथरा जुनवानी
तेकर पाचन चंदन अस
हवे माटी मुड मिंजनी
दार भात चुरगे अउ
पुरगे एकर कहनी

– डा अनिल भतपहरी
जुनवानी (तेलासी – भंडारपुरी )

The post माटी मुड मिंजनी appeared first on गुरतुर गोठ : छत्तीसगढ़ी (Chhattisgarhi).

मोर गांव कहां गंवागे संगी, कोनो खोज के लावो।
भाखा बोली सबो बदलगे, मया कहां में पावों।
काहनी किस्सा सबो नंदागे, पीपर पेड़ कटागे ।
नइ सकलाये कोनों चंउरा में, कोयली घलो उड़ागे।
सुन्ना परगे लीम चंउरा ह, रात दिन खेलत जुंवा ।
दारु मउहा पीके संगी, करत हे हुंवा हुंवा ।
मोर अंतस के दुख पीरा ल, कोन ल मय बतावों
मोर गांव कहां …………………..
जवांरा भोजली महापरसाद के, रिसता ह नंदागे ।
सुवारथ के संगवारी बनगे, मन में कपट समागे ।
राम राम बोले बर छोड़ दीस, हाय हलो ह आगे ।
टाटा बाय बाय हाथ हलावत, लइका स्कूल भागे
मोर मया के भाखा बोली, कोन ल मय सुनावों ।
मोर गांव कहां…………………………
छानी परवा सबो नंदावत, सब घर छत ह बनगे।
बड़े बड़े अब महल अटारी, गांव में मोर तनगे।
नइहे मतलब एक दूसर से, शहरीपन ह आगे ।
नइ चिनहे अब गांव के आदमी, दूसर सहीं लागे ।
लोक लाज अऊ संसक्रिती ल, कइसे में बचावों
मोर गांव कहां……………………
धोती कुरता कोनों नइ पहिने, पहिने सूट सफारी
छल कपट बेइमानी बाढ़गे, मारत हे लबारी ।
पच पच थूंकत गुटका खाके, बाढ़त हे बिमारी ।
छोटे बड़े कोनों मनखे के, करत नइहे चिन्हारी ।
का होही भगवान जाने अब, कोन ल मय गोहरावों
मोर गांव कहां………………………….
जगा जगा लगे हाबे, चाट अंडा के ठेला ।
दारु भटठी में लगे हाबे, दरुहा मन के मेला ।
पीके सबझन माते हाबे, का गुरु अऊ चेला ।
लड़ई झगरा होवत हाबे, करत हे बरपेला ।
बिगड़त हाबे गांव के लइका, कइसे में समझावों
मोर गांव कहां गंवागे
संगी, कोनों खोज के लावो।।

महेन्द्र देवांगन “माटी”
गोपीबंद पारा पंडरिया
जिला — कबीरधाम (छ ग )
पिन – 491559
मो नं — 8602407353
Email – mahendradewanganmati@gmail.com

The post मोर गांव कहां गंवागे appeared first on गुरतुर गोठ : छत्तीसगढ़ी (Chhattisgarhi).

कुल 264 शब्‍द

The post अ – छत्‍तीसगढ़ी हिन्‍दी शब्‍दकोश appeared first on गुरतुर गोठ : छत्तीसगढ़ी (Chhattisgarhi).

The post आ, इ, ई, छत्‍तीसगढ़ी हिन्‍दी शब्‍दकोश appeared first on गुरतुर गोठ : छत्तीसगढ़ी (Chhattisgarhi).

रुख रई जंगल के , बिनास देख , भगवान चिनतीत रिहीस । ओहा मनखे मन के मीटिंग बलाके , रुख रई लगाये के सलाह दीस । कुछ बछर पाछू , भुंइया जस के तस । फोकट म कोन लगाहीं । भगवान मनखे मन ल , लालच देवत किहीस के रुख रई के जंगल लगाये बर , मनखे ल , मुफत म भुंइया अऊ नान नान पऊधा बितरन करहूं , संगे संग घोसना करीन के , जे मनखे मोर दे भुंईया म बहुत अकन रुख , रई , झाड़ झरोखा लगाही , अऊ वोला सुरकछित राखही , ओमन ल जीते जियत परिवार समेत सरग देखाहूं ।

समे बीते के पाछू , रुख लगइया मन तीर पहुंचगे भगवान । एक झिन बतइस , हमन अइसे रुख लगाये हाबन , जे न केवल हमन ल सुख देवथे , बलकी अवइया हमर कतको पीढही ल सुख अऊ समरीद्धी दिही । भगवान किथे – तुंहर जंगल ल , देखतेन । दूसर दिन , बड़े जनीस भुंइया म बिसाल सभा के आयोजन , घंटों भासन , तहन रासन , सांझ कुन अऊ ……., रथिया अऊ…….। भगवान कसमसावत , आंखी ल मूंद लीस । दूसर दिन बिहाने ले भगवान फेर पचारिस – आज तोर रुख ल देखाते का जी ? ओ किथे – या.. काली नी देखेव का ? चलव ….. दूसर गांव म बड़े जिनीस सभा , कोरी खइरखा मनखे , पांव धरे के जगा निही , चारों डहर खोसकीस खोसकीस ……। भगवान पूछथे – कती करा हे तुंहर रुख , देखा मोला …. खाली भीड़ भडक्का म धुर्रा खाये बर ले आनथस । मनखे किथे – अतका कस मनखेरुख तोला नी दिखत हे भगवान …… , मुहूं ल फार दीस भगवान । भगवान पूछीस – ये कइसे रुख आय जी ? मेंहा रुख रई जंगल लगाये बर केहे रेहेंव , तूमन मनखे के जंगल लगा देव ? मनखे किथे – जे रुख लगाये ले सरग के सुख मिलही , तिही ल लगाये हाबन जी । भगवान रटपटा के किहीस – तूमन ल सरग लेगना तो दूर , जुरमाना होही , बिन हमर आगिया , हमरे जगा भुंइया म दू गोड़िया रुख लगा डरेव । मनखे किथे – जुरमाना …. रुख लगाये बर तोर भुइंया के एक इंच इसतेमाल नी करे हाबन , अऊ तो अऊ ये रुख के बाढ़हे बर तोर सुरूज के घाम तक नी ले हाबन । तैं खुदे देख …। भगवान धियान करके देखे लागीस । वाजिम म , भासन के खेत म , आसवासन के खातू , लालच के पानी अऊ मउकापरसती के घाम म खसकस ले उपजे रहय , बन बांदुर कस , मनखे रुख । बीच बीच म राहत के कीटनासक के छिड़काव करके , कीरा परे ले बचा डरय । भगवान पूछीस – एकर फल फूल म , तूमन ल कायेच फयदा होवत होही ? वो किथे – इहां के बात तोर समझ म नी आवय , ये रुख म जे फूल खिलथे , तेकर महक म कतको झिन बऊरा जथे । पांच बछर म एक बेर फूलथे , ये फूल के नाव वोट आय । इही वोंटफूल हा , कुछ दिन म खुरसी फर बन जथे , जेला एक बेर तहूं चिखबे ते , सरग ल भुला जबे , वापिस नी जांवव कहिबे । भगवान किथे – त मोर दे भुंइया अऊ पउधा के का होइस जी ? ओ मनखे किथे – तोरे दे जमीन अऊ अपन जमीर ल बेंचथन तभे , अतका कस मनखे पेंड़ ल पालथन भगवान …., रिहीस तोर पउधा के , होही कहूं करा फेंकावत , हमर सरग इंहे हे , हम का करबो तोर पउधा ल , लेग जा वापिस ……। मुड़ी पीटत , दूसर रुख लगइया खोजे लागीस …….।

तहूं रुख लगाथस का जी ? देखा भलुक , कइसने लगाये हस ? ओ किथे – तैं सी. बी. अई. के मनखे तो नोहस ? भगवान किहीस – अरे नोहो रे भई , मेंहा भगवान अंव …। वो फेर किथे – अच्छा ….., तोला , कन्हो जांच वाले समझत रेहेंव । तूमन ल हमर रुख का दिखही भगवान ? हमर साहेब खानदान म , हमन अपन रुख इहां नी लगावन , हमर रुख स्वीस बैक म जामथे । का….. मुहुं ला फार दीस भगवान ? ओ किथे – हव भई , हमन पइसा के रुख लगाथन , जेला कन्हो ल देखन नी देवन । जे देख डरथे , तेला नान नान चंटा देथन । भगवान खिसियइस – कस रे साहेब , अइसने रुख लगाये म तूमन ल सुख मिलथे रे ? जुरमाना लागही , बिन आगिया के दूसर के जगा भुंइया म रुख जगो डरे । ओ जुवाब दीस – काके जुरमाना भगवान , न तोर भुंइया , न तोर हवा , न तोर परकास । भगवान पूछीस – त कइसे जाम जथे तोर रुख ? वो किथे – कागज के खेत म , भरस्टाचार के खातू , जनता के लहू म सिचई अऊ हेराफेरी के घाम म मोर रुख लहलहाथे भगवान जी…… तैं का जानबे…… । लबारी के कीटनासक ओकर रकछा करथे । मोर लगाये रुख म , मोर सात पीढ़ही बइठे बइठे सरग कस खा सकत हे । भगवान किथे- मोर भुंइया ल का करेव ? ओ मनखे बतइस – उही ला गिरवी धरेन ……….. तभेच तो ……। धकर लकर दूसर कोती टरक दीस भागीस भगवान ।

गड्ढ़ा खनत मनखे ल पूछीस – रुख जगोये बर खनथस का जी ? वो किथे – का रुख लगाबे भगवान , ओला रात दिन , राजनीती के ढोर डांगर मन चर देथे । भगवान पूछीस – त गड्ढा काबर खनथस ? ओहा किथे – रुखेच जगोये बर आय , फेर अपन रुख जगोहूं । भगवान फेर पचारिस – हमर दे रुख नी लगावस का जी ? ओ किथे – ओला का करबे , आज लगाबे , काली उखानबे , नी उखानबे तभो उखनही , वइसे भी हमर देस के सरकारी भुंइया म तोर रुख जगोये के अऊ ओला खड़े राखे के ताकत निये । आज गड्ढा कोड़थन , महीना भर पाछू , रुख के जगा बिलडिंग खड़ा हो जथे । भाखा , जाति , छेत्र अऊ धरम के गड्ढा भले कभू नी पटाये , फेर रुख लगाये बर खने गड्ढा दूसरेच दिन पटा जथे । तोर दे रुख लगइच देबो त , तामझाम के भुंइया म , परचार के खातू अऊ सुवारथ के सिचई , खइत्ता ताय , कतिहां ले जामही …..। किरागे तंहंले , अवसरवादिता के कीटनासक म कतेक दम……। तेकर सेती , तोर दे रुख के ओधा म , हमन अपन रुख , अइसे जगा जगोथन , जेहा जामथे ते जगा भुंइया हा , सहर बन जथे । का …… भगवान सोंच म परगे ? देखइस अपन रूख ला ……..जेती देख तेती घरेच घर , बड़े बड़े बिलडिंग , फेकटरी ……. अऊ कांकरीट के जंगल । भगवान सुकुरदुम होगे ।

चिरहा कुरता पहिरे , बीता भर खोदरा पेट के मनखे का रूख लगावत होही ……इही सोंच रेंगत रिहीस । तभे अवाज अइस , रुख तो मोरो करा बहुत हे भगवान , फेर लगावंव कती । जे भुंइया ल मोर किथंव , तेला सरकार नंगा लेथे , बिन भुंइया के कामे जगो डरंव । जियत जियत सरग जाये के साध म , एक ठिन रुख लगाये के उदिम , महूं कर पारथंव , फेर ओला पेंड़ाये म काटे पर जथे । भगवान किथे – अब समझ अइस , हमर जंगल ल कोन काट बोंग के परयावरन ल नकसान पहुंचाथे , लेगव ले नरक म एला । वो किथे – वा……. कइसे करथस भगवान , तैं कहत हस ते रुख ल काटना तो दूर , ओकर सुखाये डारा पाना ल सकेले म हमन पकड़ा जथन , ओ रुख मन ल टरक टरक भर के सहर म बेंचइया मन मलई खावत हे , अऊ हमन ल नरक लेगहूं किथस । में तो अपन रुख के बात करत हंव । भगवान किथे – देखा , तोरो रुख ल , कइसना हे ? वो रोवत किहीस – का देखावंव , गरीबी के खेत म , मेहनत के खातू अऊ पछीना के सिचई म , अरमान के रुख लगाथंव भगवान । फेर उहू ल , कलह अऊ सुवारथ के किरवा मन , सरकारी बिकास के पइसा कस चुहंक देथे । कतको सामपरायदिकता के बन बांदुर ल नींदथंव , तभो जामीच जथे । तियाग अऊ तपसिया के दवई हा , मंहंगई के घाम झेले नी सकय , लेसा जथे , ले दे के मोर अरमान के रुख बाढ़िच जथे , तब इही रुख के टोंटा मसक के , ओकर बोटी बोटी करके , अपन लइका पढ़हाथंव , येकरे कुटका ले हमर चूलहा म आगी सिपचथे , रंधनी खोली म कुहरा गुंगवाथे , मोर बिमार दई के दवई आथे , अऊ अपन बई के लाज ढांकथंव । मोर अरमान के रुख , मोला आज तक सुख नी दीस , त मोर नोनी बाबू ल का सुख दिही । ये रुख जबले जामे हे , मन म दुखेच उपजथे । अइसन रुख ल तोरे तीर लेग जते भगवान । भगवान किथे – में काये करहूं , इही रुख के सेती खुदे किंजरत हंव ये दुआर ले वो दुआर ………..।

हरिशंकर गजानंद देवांगन
छुरा.

The post अपन अपन रुख appeared first on गुरतुर गोठ : छत्तीसगढ़ी (Chhattisgarhi).

अब तो करम के रहिस एक दिन बाकी
कब देखन पाबों राम लला के झांकी
हे भाल पांच में परिन सबेच नर नारी
देहे दुबवराइस राम विरह मा भारी
दोहा –
सगुन होय सुन्दर सकल सबके मन आनंद।
पुर सोभा जइसे कहे, आवत रघुकुल चंद।।
महतारी मन ला लगे, अब पूरिस मन काम
कोनो अव कहतेच हवे, आवत बन ले राम
जेवनी आंखी औ भूजा, फरके बारंबार
भरत सगुन ला जानके मन मां करे विचार
अब तो करार के रहिस एक दिन बाकी
दुख भइस सोच हिरदे मंगल राम टांकी
कइसे का कारण भइस राम नई आईन
का जान पाखंडी मोला प्रभु विसराईन
धन धन तै लक्ष्मिन तै हर अस बड़भागी
श्रीरामचंद्र के चरन कवल अनुरागी
चीन्हिन अड़बड़ कपटी पाखंडी चोला
ते कारन अपन संग नई लेईन मोला
करनी ला मोर कभू मन मा प्रभू धरही
तो कलप कलप के दास कभू नई तरही
जन के अवगुनला कभू चित नई लावै
बड़ दयावंत प्रभु दीन दयाल कहावै
जी मा अब मोर भरोसा एकेच आवै
झट मिलहि राम सगुन सुभ मोला जनावै
बीते करार घर मा परान रह जाही
पापी ना मोर कस देखे मां कहूं आही
दोहा –
राम विरह के सिन्धु मां, भरत मगन मत होत।
विप्र रूप धर पवन सुत, पहुंचिन जइसे पोत।।

पद्मश्री डॉ.मुकुटधर पाण्‍डेय

(श्री राकेश तिवारी जी द्वारा सन् 1996 म प्रकाशित छत्‍तीसगढ़ी काव्‍य संग्रह ‘छत्‍तीसगढ़ के माटी चंदन’ ले साभार)

The post उत्तर कांड के एक अंश छत्तीसगढी म appeared first on गुरतुर गोठ : छत्तीसगढ़ी (Chhattisgarhi).

जतका दूध दही अउ लेवना।
जोर जोर के दुध हा जेवना।।
मोलहा खोपला चुकिया राखिन।
तउन ला जोरिन हैं सबझिन।।
दुहना टुकना बीच मढ़ाइन।
घर घर ले निकलिन रौताइन।।
एक जंवरिहा रहिन सबे ठिक।
दौरी में फांदे के लाइक।।
कोनो ढेंगी कोनो बुटरी।
चकरेट्ठी दीख जइसे पुतरी।।
एन जवानी उठती सबके।
पंद्रा सोला बीस बरिसि के।।
काजर आंजे अंलगा डारे।
मूड़ कोराये पाटी पारे।।
पांव रचाये बीरा खाये।
तरुवा में टिकली चटकाये।।
बड़का टेड़गा खोपा पारे।
गोंदा खोंचे गजरा डारे।।
पहिरे रंग रंग के गहना।
ठलहा कोनो अंग रहे ना।।
कोनो पैरी चूरा जोड़ा।
कोनो गठिया कोनो तोंड़ा।।
कोनों ला घुंघरू बस भावे।
छम छम छम छम बाजत जावें।।
खनर खनर चूरी बाजै।
खुल के ककनी हाथ विराजे।।
पहिरे बहुंटा और पछेला।
जेखर रहिस सौंख हे जेला।।
दोहा-
करधन कंवर पटा पहिर, रेंगत हाथी चाल।
जेमा ओरमत जात हे, मोती हीरा लाल ।।

पं.सुन्‍दर लाल शर्मा

(श्री राकेश तिवारी जी द्वारा सन् 1996 म प्रकाशित छत्‍तीसगढ़ी काव्‍य संग्रह ‘छत्‍तीसगढ़ के माटी चंदन’ ले साभार)

The post दानलीला कवितांश appeared first on गुरतुर गोठ : छत्तीसगढ़ी (Chhattisgarhi).

एक दिन गदहा मन के गांव म मंझनिहां बेरा हांका परिस- गुडी म बलाव हे हो- ढेंचू , जल्दी जल्दी सकलावत जाव हो ढेचू। सुनके गांव के जम्मो गदहा गुडी म सकलागे, कोतवाल गदहा ल पूछेगिस- कोन ह मईझनी-मंझनिहा बईठका बलाय हे ? तब एकझन सियान गदहा ह बोलिस-में ह बलायहंव ग बईठका ल, बात ये हे के आज बिहनिया बेरा जब में ह ईस्कूल कोती चरेबर गेरहेंव, त ईस्कुल के खिडखी ह खुल्ला रहिस हे,ओती ले अवाज आवत रहिसहे जेमा- बडे गुरूजी ह छोटे गुरूजी मन ल खिसियावत काहत रहिसहे के कोन्हों लईका ल अब भूल के भी गदहा नई कहना हे यदि कोनो गदहा कहेव त तुमन ल जेल जाय ल पड जही, अतका ल सुनके में ह गुनेव – आज मोटर-गाडी के जमाना म हमर काम-बूता ह तो नंदा गेहे कोन्होकाल के ईस्कुल म हमर नाव ह चलत हे तेनो ह नंदा जही तईसे लागथे, अईसन म तो हमर कोन्हों जघा पुछारी नई रईही। अतका ल सुनके ऊंहां बईठे जवान गदहा मन तमतमागे, अउ बडे गुरूजी ल फलान-ढेकान कहेबर सुरू करदिस, तब सरपंच गदहा ह सब झन ल चुप करावत कहिस के अरे छोकरा हो थोरकन धीरज धरव न जी, पहिली बडे गुरूजी ल इंहा बला के पूछ तो लव, वो ह अईसन काबर कहिस तेला। तब जवान गदहा मन खुरचत- खुरचत चुप होगे अब कोतवाल गदहा ल बोलेगिस के जा बडे गुरूजी ल बला के लाबे, कोतवाल ह बडे गुरूजी ल बलायबर चल दिस।
एती जम्मो गदहामन आपस म बिचार करके निरनय लिन के ये मनखेमन के मनमानी ह मुडी ले उप्पर नहांकतहे, अब कुछ न कुछ जतन करेच्चबर परही, सबोझन हव कहिके एकमत होगे। ओतकेबेर कोतवाल संग बडे गुरूजी ह बईठका म पहुंचगे, जवान गदहामन बडे गुरूजी ल देख के आंखी ल तरेरेबर लगिन, गुरूजी घलो सकपकागे, सोंचेबर धर लिस के का बात होगे… तभे सरपंच गदहा ह बडे गुरूजी ल जय जोहार करिस अउ पीपरतरी चउरा म बइठारिस, अब सब्बेझन चूप होगे, भई गुरूजी आखिर गुरूजी होथे ओखर आघू म बडे बडे के मुंह सीला जथे, देख-ताक के गोठियाय ल परथे, ये दसा ल समझ के बडे गुरूजी ह कहिस- का बात हे सरपंच जी, कटकट ले जुरियाय हव जी अउ मोला काबर बलवायहव ग । तब सरपंच गदहा ह हिम्मत ल बटोर के जम्मो बात ल गुरूजी ल बतईस अउ पूछिस के आपमन काबर छोटे गुरूजी मन ल बरजत रहेव के कोन्हों लईका ल भूल के भी गदहा नई कहना हे कहिके।बडे गुरूजी ह समझगे के जवान गदहामन काबर वोला गुर्री गुर्री देखत हाबय, अउ कहिस के आर. टी. ई. आगे हे सरपंच जी।सरपंच गदहा कथे आंय… आर. टी. ई.,ये काय बला ये गुरूजी। कोन्हों गदहा समझ नई पईन, तब सरपंच गदहा ह पूछथे ये आर. टी. ई. ह का हरे गुरूजी, बने फोर के बतावव। बडे गुरूजी ह समझावत कहिस – ये ह हमर देस के नवा कान्हून हरे जी, जे ह कहिथे- हमर देस के जम्मो लईका ल बिना खरचा के आठवी तक पढे के अधिकार हे, अउ ये पढई म कोन्हों लईका ल मारना पीटना नई हे, गारी गल्ला तको नई देना हे, कुकूर-बिलई-बेंदरा अउ गदहा घलो नई कहना हे, यदि कोन्हों कईही त कान्हून ह ओखर बूता बना दीही, उही बात ल मे ह छोटे गुरूजी मन ल बतावत रहेंव जी जेला तूंहर सियान गदहा ह सुन डरिस, अब तूहीमन बताव, मे ह का गलत कहेंव। अतका ल सुनके पूरा बईठका म बिरबिट ले सांति झपागे।थोरकन देर म सरपंच गदहा ह कथे- बडे गुरूजी आपमन ठीके कहे हव।…फेर आपमन गुरूजी हरव, जम्मो मुस्किल ले पार निकले के रद्दा बतईया, मोर आपमन ले बिनती हे के आपेमन कउनो अइसन उपाय बतावव जेमा हमर नामो चलत रहय अउ आपोमन ल कांही झन होय। तब बडे गुरूजी ह थोरकन गुने के बाद कहिस- एक काम करव सरपंच जी, तुमन दिल्ली जावव ऊंहां एकठन रामलील्ला मईदान हे, जिहां जाके धरना देके बईठ जव। कोनो गदहा समझ नई पईन के ये गुरूजी ह का काहत हे।तब सियान गदहा पूछथे- ये धरना ह का हरे, त बडे गुरूजी बताथे- धरना मतलब अपन मांग ल सरकार ले मनवाय खातिर बिन खाय पिये जुरिया के कई दिन ले तब तक बईठे रहना जब तक सरकार ह मांग ल नई मान जाय। तुमन सरकार ले एक्केठन मांग करहू के आर. टी. ई. म सुधार करे जाय, जनरल परमोसन ल बंद करे जाय अउ लईका मन के फेल-पास ल फेर सुरू कर दिये जाय, काबर के लईका मन तो पास हो जथंन कहिके पढना-लिखना ल बंद कर देहे अउ गुरूजी मन पढाना।बस अतके बोलहू सरकार करा।एकबार फेल-पास ह सुरू हो जही तहांले फेर गुरूजी मन लईका मन ल बने पढाय खातिर मारही पीटही अउ गदहा घलो कईही, अईसन म ईस्कूल म तूंहर नांव घलो चले बर धर लिही अउ हमूंमन कान्हून ले बांच जबोन जी ।तब सरपंच गदहा पूछथे- हमर बात ल सरकार ह मान जही गुरूजी! तब गुरूजी कथे- हां जी, बस तूंहर जुरियाय के देरी हे, तुमन ऊंहा देखहू कईझन पत्रकार अउ टीवी वाला मन झूम जही, ओखर मन के आवत देरी रथे तहां ले भीड घलो जुरिया जथे, सरकार के बिरोधी पार्टी वाले नेता मन तो अइसने घटना ल खोजत रहिथे, तूंहर संग वहुमन धरना म बईठ जही अउ तूंहर पूरा सांथ दीही।अतका ल सुनके जम्मो जुरियाय गदहा मन हांमी भर दीन, सरपंच गदहा ह हूंत करात बोलिस के दू दिन बाद जम्मो गदहा ल अपन बाल-बच्चा सहित खाना-खर्चा ल धर के दिल्ली कूच करे बर टेसन म इकट्ठा होना हे।
अब दू दिन का महिना भर दिन बीतत हे,फेर गदहा मन दिल्ली कूच नई कर पाय हे, चउक-चउक म उंघाय खडे हे, कोनो अघुवा बनही त संग म लग जबो सोंचत हे, झंझट अउ खरचा ल घलो डर्रात हे।
अईसनहे आज हमरो हाल हे, सब ल समझ म आवत हे के ये नवा सिक्छा कान्हून म बडका खामी हे, अउ वो हे- जनरल परमोसन, हमर लईका मन पढई म लगातार पिछवावत जात हे, फेर ये बात ल उठाय बर कोनो अघुवा के इंतजार म हे। हे भारत माता तोर लईकामन कब जागही वो ?

ललित वर्मा “अंतर्जश्न”
छुरा

The post गदहा मन के मांग appeared first on गुरतुर गोठ : छत्तीसगढ़ी (Chhattisgarhi).

🔊 ये रचना ला सुनव

रमेसर अपन घर के दुवारी मा मुड़ धर के चंवरा मा बैइठे हे उही बेरा बड़े गुरुजी अपन फटफटी मा इस्कूल डाहर जावत ओला देख परीस।खड़ा होके पूछिस का होगे रमेसर? कइसे मुड़धर के बइठे हस ? रमेसर पलगी करत कहिस- काला काहंव गुरुजी, बइला के सिंग बइला बर बोझा। तुही मन सुखी हव।गुरजी कहिस-तब कहीं ल बताबे कि अइसने रोते रबे, बोझा ल बांटबे त हरु होही।बिमारी के दवाबूटी करे जाथे। रमेसर हाथ मा मुड़ी धरे कहे लगीस- किसानी के दिन बादर आगे गुरजी ,हाथ मा एकोठन रुपया नइ हे। पाछू बच्छर के करजा छुटाय नइ हे।फेर खेती किसानी करना हे कइसे होही कहिके मुड़ी धर के बइठे हंव।असाढ़ के बादर घुमत हे खेती संवारे बर तुतारी देवत हे।गुरुजी कहिस- देख रमेसर कहे जाथे “खेती अपन सेती” फेर आज तुमन पर भरोसा खेती किसानी करत हव। परोसी के हाथ म सांप मरवाय ले काय होथे तेला जानत हस।आज धान के बिजहा नइ राखत हव।हाइब्रिड के चक्कर मा पइसा लुटावत हव ।घुरवा के गोबर खातू स्वचछता अभियान के चढ़ावा मा चल दिस।रसायनिक खातू,दवई मा खरचा करत हव। कमाय बर कोढ़िया होगेव ।नांगर बइला उन्नत खेती मा फंदागे।टेक्टर मा जोतई बोवई अऊ मतई करत हव।सब पर भरोसा।पइसा नइ हे तब करजा बोड़ी करत हव।इही उन्नत खेती आय।निंदई नइ करके निंदानासक बउरत हव।धान ल कतकोन बिमारी ले बचाय खातिर, बाढ़े अऊ, पोटराय खातिर आनी बानी के रसायनिक दवई डारत हव।आखिर मा लुवाई अऊ मिजाई घलाव ल टेक्टर थ्रेसर हारवेस्टर मा करत हव। अतका होय के पाछू धनलक्ष्मी ल अपन घर मा नइ लावव, बहिरे बहिर भाड़ा करके मंडी भेजवा देवत हव। अब बता रमेसर कोन करा तै अपन जांगर खपाय अऊ कोन करा पइसा बचाय।तोर खेती मा तैं नांगर नइ जोते, धान नइ बोय, निंदई नइ करे,खातू कचरा नइ डारे, लुवई मिंजई नइ करे तब तैं करजा मा नइ बूढ़बे त कइसे करबे।पर भरोसा खेती करत हस तभे मुड़ धरके रोवत हस। रमेसर मूहूं फार दिस।गुरुजी के सबो गोठ सुन के ओकर बुध पतरा गे। थोकिन साहंस भरके कहिस- सही कहात हव गुरुजी फेर कइसे कर सकत हन। पढ़े लिखे बहू आय हे ओ खेत नइ जान कहिथे।बेटा पढ़ लिख के नउकरीच खोजत हे।खेती नइ करंव कहिथे। गाय गरु झन रखव कहिके बइला ल बेंचवा दिन हे।हमर मन के उमर बाढ़त हे अऊ जांगर खंगत हे।बनिहार नइ मिलय।तब खेत ल परिया घलो नइ पार सकन।ऐकर सेती अइसने किसानी करत हन। गुरुजी पूछिस – तोर खेत मा तो बोर खनाय हस का? के फसल लेथस। कहां गुरुजी , बोर मा पानी कम निकलिस त धान के एक फसल लेथंव। बस इही तोर करजा मा लदाय के कारन आय। आजकल तीन फसल के खेती होवत हे अउ तैं एक फसल मा घिरयाय हस। मोर बात ल मान अउ ऐसो ले कम से कम तीन फसल लेय के उदिम कर ,कम पानी वाला फसल लगा एकर बर ग्राम सहायक मन संग मिल अउ गोठिया।अतका सुनके रमेसर के मुड़ी ले हाथ उतर गे। गुरुजी कहिस – सुन रमेसर आज करजा मा खेती तोरेच गलती नइ हे एकर बर बहुत झन जिम्मेदार हावय।बिदेसी नकल,सरकार के नीति अऊ सरकारी अधिकारी, उन्नत खेती के भरम, दवई बेचाईया कंपनी ,सही जनकारी नइ होना अउ पर भरोसा खेती।

हीरालाल गुरुजी “समय”
छुरा जिला-गरियाबंद

The post पर भरोसा किसानी : बेरा के गोठ appeared first on गुरतुर गोठ : छत्तीसगढ़ी (Chhattisgarhi).

मनखे ला सुख योग ह देथे,पहिली सुख जेन कहाथे ।
योग करे तन बनय निरोगी,धरे रोग हा हट जाथे।।1

सुत उठ के जी रोज बिहनियाँ,पेट रहय गा जब खाली ।
दंड पेल अउ दँउड़ लगाके, हाँस हाँस ठोंकव ताली ।।2

रोज करव जी योगासन ला,चित्त शांत मन थिर होही ।
हिरदे हा पावन हो जाही,तन सुग्घर मंदिर होही।।3

नारी नर सब लइका छउवा, बन जावव योगिन योगी ।
धन माया के सुख हा मिलही,नइ रइही तन मन रोगी।।4

जात पाँत के बात कहाँ हे, काबर होबो झगरा जी।
इरखा के सब टंटा टोरे, योग करव सब सँघरा जी।।5

जेन सुभीता आसन होवय,वो आसन मा बइठे जी।
ध्यान रहय बस नस नाड़ी हा,चिंता मा झन अइठे जी।।6

बिन तनाव के योग करे मा, तुरते असर जनाथे गा ।
आधा घंटा समे निकालव, मन चंगा हो जाथे गा ।।7

अनुलोम करव सुग्घर भाई, साँस नाक ले ले लेके ।
कुंभक रेचक श्वांसा रोंके, अउ विलोम श्वांसा फेके ।।8

प्राणायाम भ्रस्तिका हावय, बुद्धि बढ़ाथे सँगवारी ।
अग्निसार के महिमा गावँव, भूँख जगाथे जी भारी ।।9

हे कपालभाती उपयोगी, अबड़े जी असर बताथे ।
एलर्जी नइ होवन देवय, ए कतको रोग भगाथे ।।10

कान मूँद के करव भ्रामरी, भौंरा जइसे गुंजारौ ।
माथा पीरा दूर भगाही, सात पइत बस कर डारौ ।।11

ओम जपव उद्गीत करव जी, बने शीतली कर लेहौ ।
रोज रोज आदत मा ढालव, आड़ परन जी झन देहौ ।।12

चोवा राम “बादल”
हथबंद (छग)

The post योग करव जी (कुकुभ छंद) appeared first on गुरतुर गोठ : छत्तीसगढ़ी (Chhattisgarhi).

महिमा भारी योग के,करे रोग सब दूर।
जेहर थोरिक ध्यान दे,नफा पाय भरपूर।

थोरिक समय निकाल के,बइठव आँखी मूंद।
योग ध्यान तन बर हवे,सँच मा अमरित बूंद।

योग हरे जी साधना,साधे फल बड़ पाय।
कतको दरद विकार ला,तन ले दूर भगाय।

बइठव पलथी मार के,लेवव छोंड़व स्वॉस।
राखव मन ला बाँध के,नवा जगावव आस।

सबले बड़े मसीन तन,नितदिन करलव योग।
तन ले दुरिहा भागही,बड़े बड़े सब रोग।

चलव साथ एखर सबे,सखा योग ला मान।
स्वस्थ रही तन मन तभे,करलव योगा ध्यान।

जीतेन्द्र वर्मा “खैरझिटिया”
बाल्को (कोरबा)

The post योग के दोहा appeared first on गुरतुर गोठ : छत्तीसगढ़ी (Chhattisgarhi).

The post उ-ऊ छत्‍तीसगढ़ी हिन्‍दी शब्‍दकोश appeared first on गुरतुर गोठ : छत्तीसगढ़ी (Chhattisgarhi).

नवा जी.एस.टी. कानून ह लागू होए म 3 दिन बांचे हे, 1 जुलाइ ले जी.एस.टी. होवत हे लागू, जी.एस.टी. के बारे में विस्तार ले कतको गजट, समाचार, पतरिका म जानकारी मिल जाही। एखर अनुसार हमन ला बुनियादी पदारथ मा 0%, 5%, 12%, 18% and 28% (+अउ लक्जरी समान मा सेस अलग ले) लगही।
अईसे तो सियान मन विस्तार ले बताहीं के कामा कतका-कतका जी.एस.टी. लगही, कुछु ह मंहगा होही त कुछु ह सस्ता, मै हर तो अतके बताए बर लिखत हौं भई के अब हम ब्लागर मन के बिरादरी बर जी.एस.टी. हर भारी परईया हे।
वइसे तो ब्यापारी भाई मन ल 20 लाख तक के टर्न ओभर मा जी.एस.टी. के रजिस्ट्रेशन मा सरकार छूट देवत हे। फेर सेंटरल जी.एस.टी. एक्ट के धारा 24 कहिथे के जउन मनखे के आमदनी के स्रोत भारत देश के बाहिर के होही, तेन ला एको रुपिया के छूट नइ मिले, ब्लागर भाई मन ह इंटरनेट ले अपन ब्लाग म एडसेंस अउ आन विज्ञापन के जरिए एको रुपिया के कमाई होही त उनला, जी.एस.टी. बर रजिस्टर होए ल लागही अऊ जी.एस.टी. तक देहे ल लागही, येमा जी.एस.टी. के रेट हर होही 18% परसेंट। तो भाई मन तिहार मनावव अउ तियार हो जावव, जी.एस.टी. रजिस्टेशन बर।
gst.gov.in म जावव, इहां रजिस्ट्रेशन कइसे करना हे विस्तार जानकारी मिलही।

प्रमोद अचिन्त्य
नवसिखिया ब्लागर

The post ब्लाग लिखईया मनखे मन ला दे-बर परही GST appeared first on गुरतुर गोठ : छत्तीसगढ़ी (Chhattisgarhi).

ओहर बेटा नोहे हे! परसा के ढेंटा आय
लाठी ल टेक टेक के सडक म बाल्टी भर पानी लानत हे
देख तो डोकरी दाई ल कैसे जिनगी ल जीयत हे
कोनो नइये ओखर पुछैया अपन दुख ल लेके बडबडावत हे
कभू नाती ल, कभू बेटा ल, कभू बहू ल गोहरावत हे
पास पडोस के मन ल अपन पिरा ल सुनावत हे
1 रूपया के चउर अउ निराश्रीत पेंषन म जिनगी ल गुजारत हे
नती के हावय डोकरी दाई बर मया
चाय पानी रोज पियावत हे
पडोसी ह भुख के बेरा म डोकरी दाई ल नास्ता करावत हे
देख तो डोकरी दाई ल कैसे अपन लाठी ल टेक टेक के पानी ल लानत हे
डोकरी दाई मने मन गुनत हे
बेटा के मया म पेंषन ल घलो सकेलत हे
बेटा के ठाठ बाट, गांव म हावे चर्चा
डोकरी दाई कुलेकुप रोअथ हे रथिया
भुला के दाई चोहना ल बेटा
अब अपन म हावे मगन
तभो ले डोकरी दाई करथे सुरता
भले हे मने मन म कहिथे बेटा ल परबुधिया
काला मोर दुख ल बतांव ग ,साहिल, मने मन गुनत हंव
ओहर बेटा नोहे हे! परसा के ढेंटा आय

लक्ष्मी नारायण लहरे साहिल
युवा साहित्यकार पत्रकार
कोसीर, रायगढ, छत्तीसगढ

The post ओहर बेटा नोहे हे appeared first on गुरतुर गोठ : छत्तीसगढ़ी (Chhattisgarhi).

मोर बोली अऊ भाखा के मय कतका करव बखान,
भाखा म मोर तीरथ बरथ हे जान ले ग अनजान।
हाय रे मोर गुरतुर बोली,
निक लागय न।
तोर हँसी अऊ ठिठोली
निक लागय न।

मोर बोली संग दया मया के,
सुग्हर हवय मिलाप रे।
मिसरी कस मिठास से येमे,
जईसे बरसे अमरीत मधुमास रे।

ईही भाखा ल गूढ़ के संगी,
होयेन सजोर,सगियान रे।
अपन भाखा अऊ चिन्हारी के,
झन लेवव तुमन परान रे।

मुड़ी चढईया भाखा ल आवव,
जुरमिर के फरियातेन।
सूत उठ के बोलतेन सबले पहिलिच
राम राम ग।
मन हरियाही,तन हरियाही,
हरियाही बोली बेवहार ग।

जय जोहर, जय छत्तीसगढ़ के,
अईसन करबो गोहार रे।
थके हारे मनखे मन के,
भगा जही पीरा संताप रे।

सिरतोन सिधवा उखरा मोर बोली,
दया मया के,
सुग्हर हयव मिलाप रे।
हाय रे मोर गुरतुर बोली,
निक लागय न।
तोर हँसी ठिठोली, निक लागय न।

विजेंद्र वर्मा अनजान
नगरगाँव (जिला-रायपुर)

The post हाय रे मोर गुरतुर बोली appeared first on गुरतुर गोठ : छत्तीसगढ़ी (Chhattisgarhi).