सुआ नाचेल जाबो संगी
चलो सुआ नाचेल जाबो
तरी हरी मोर सुअना
नहा नरी नहा न गाबो

संगी संगवारी जुर मिलके
माटी के सुआ बनाबो
माटी के सुआ शोभा बरनी
हरियर रंग म रंगाबो

सखी सहेली टोली बनाके
चलो सुआ नाचेल जाबो
तरी हरी मोर सुअना
नहा नरी नहा न गाबो

एके रंगके झम्मक लुगरा
पहिरके नाचेल जाबो
घर अंगना अउ पारा मोहल्ला
सुआ नाच ल देखाबो

सुआ नाचत गीत गा गाके
ताली थपती ल बजाबो
तरी हरी मोर सुअना
नहा नरी नहा न गाबो!!

मयारुक छत्तीसगढ़िया
सोनु नेताम “माया”
रुद्री नवागांव धमतरी
🔊 ये रचना ला सुनव

The post सुआ नाचेल जाबो appeared first on गुरतुर गोठ Chhattisgarhi.

आनी बानी के फूल सजा के
लिखथें मया पिरीत के परचा
घर अंगना म फूले फुलवारी
आओ कर लेथन एकर चरचा!

छत्तीसगढ़ के ये आय चिन्हारी
लाली पिंवरी चंदैनी गोंदा
सादा सुहागा फूल दसमत ले
सुघराये गजब घर घरोंदा!

मुच मुच मुसकाये रिगबिग चिरैया
मन लुभाये झुंझकुर गोप्फा पचरंगा
लाली लाली लहराय मंदार
पाठ पूजा बर होथे बड़ महंगा!

हवा म मारे मंतर मोंगरा
अपने अपन मन खिंचत जाय
दिन भर के लरघाय जांगर
रातरानी ले बिकट हरियाय!

महर महर ममहाय दवना
गोरी के बेनी म झुल झुल जाय
देख मयारू के मन माते मतौना
चारो खुंट मया के रंग बगराय!

ललित नागेश
बहेराभांठा (छुरा)
गरियाबंद(छ.ग.)
🔊 ये रचना ला सुनव

The post घर के फुलवारी appeared first on गुरतुर गोठ Chhattisgarhi.

नानकुन गांव धौराभाठा के गौंटिया के एके झिन बेटा – रमेसर , पढ़ लिख के साहेब बनगे रहय रइपुर म । जतका सुघ्घर दिखम म , ततकेच सुघ्घर आदत बेवहार म घला रहय ओखर सुआरी मंजू हा । दू झिन बाबू – मोनू अउ चीनू , डोकरी दई अउ बबा के बड़ सेवा करय । बड़े जिनीस घर कुरिया के रहवइया मनखे मन ल , नानुक सरकारी घर काला पोसाही , नावा रइपुर म घर ले डारिन अउ उंहीचे रेहे लागिन ।
कलोनी म , किसिम किसिम के , अलग अलग राज ले आय मनखे रहंय ।‍ धीरे धीरे मन माढ़े लागिस , लोगन मन ले परिचे होवन लागिस , तइसने म घाम के महीना बईसाख आगे । लइकामन के इसकूल के छुट्टी के समे आगे । दूरिहा – दूरिहा के रहवइया मनखे मन अपन अपन देसराज जाए के तियारी करे लागिन । जम्मो झिन छुट्टी म चल दिहीं त हमन कइसे करबो मंजू ? का करबोन ? हमूमन माईपिल्ला , अपन गांव जाबोन अउ अपन घर दुआर के मराम्मत कराबोन , अउ अपन खेतखार ल दुरूस्त करवाबोन , उंहीचे अपन लोग लइका ल किंजारबो , अउ खेतखार के जानकारी देबोन – रमेसर के गोठ के जवाब देवत रहय मंजू । रमेशर किथे – तेकर ले कहांचो दूसर ठउर जातेन का , थोरकुन समे बर ? गांव म लइकामन बोरिया जथे , फेर दाई-बाबू मन के किंजरे के सउंख घला पूरा हो जही । उंहू….. , एक काम करे जाय , जम्मो परोसी मन ल घला किथौं , अपन अपन देसराज त हर बछर जाथौ , ये बखत जुरमिल के अलग अलग परदेस जाबोन , इही बहाना परिचे घला पोट्ठ हो जही । जम्मो योजना बनगे ओतकिच बेरा । तीर तखार के जम्मो लइका सियान तियार होगे , बइठका सकलागे , तारीख तिथी निच्चित होगे । मराठी बाबू ठाकरे ल पूरा जात्रा के परभारी बना दिन । बड़े जिनीस बस किराया कर डारिन । कोन कोन जाहीं , कतका संखिया होही – तेकर हिसाब होए लागिस । संखिया अउ सीट के हिसाब ले , रमेशर के महतारी-बाप छूटत रहय । रमेसर – मंजू के बनाए योजना , ओकरे महतारी बाप के जाए के मनाही म , इंखर दिल टूटगे । यहूमन , नइ जाए के घोसना कर दिन । एमन ल ठाकरे साहेब बड़ समझाइस , फेर एमन नइ मानिन ! मंजू के कहना अतकेच रिहीस , कि बिन सास ससुर के , नइ जावन । एड्वांस पईसा डूबे के घला फिकर नि करिन । तारीख लकठियागे , उही समे भाटिया साहेब के छुट्टी निरस होगे , पइसा घला जमा नि करे रहय एमन ! भाटिया साहेब फोकट फोकट पइसा देबर मना कर दिस । आरथिक बोझा जवइया मन उप्पर बाढ़हे लागिस । जाए के एक दिन पहिली , ठाकरे साहेब मजबूरी म , रमेसर करा पहुंच गिस । ओला महतारी बाप सम्मेत जाए बर मनाए लागिस । रमेसर- मंजू गांव जाए के तियारी करत रहंय । फेर ददा के आदेस ले , इंखरे संग जात्रा निच्चित होगे !




बड़े जिनीस बस इंखर घर के आगू म आके ठाढ़ होइस । रमेसर मन जम्मो झिन , आगू ले चइघ के सीट पोगरा डारिन । धीरे धीरे मोहल्ला भर के मनखे जुरिआए लागिन , अउ अपन अपन सीट म बइठे लागिन । राव साहेब आतेचसाट बम होगे , रमेशर अउ ओखर परिवार ल देखके । आगू के दूनों सीट मोर नाव ले बुक हे , ओकर पाछू के बेहरा बाबू के नाव ले । तूमन ल अपन सीट के होस हवास नइये का ? डोकरा डोकरी ल झिन लेगहू केहे रेहेन , उहू मन ला धर के ले आने । रद्दा म इंखर नाव लेके कहीं तकलीफ होही त तुंहर मजा ल बताहौं , घुचो हमर सीट ले – राव साहेब झंझेटत रिहीस रमेसर ल । रमेसर के चेहरा तमतमागे , कुछु बोलतीस तेकर पहिली , ओकर बाबू केहे लागिस – तुंहरे संगवारी मन जाय बर किहीन , तब जावथन बेटा । रिहीस बात सीट के , हमन ल जनाकारी नि रिहीस के , सीट म जम्मो जात्री मन के नाव लिखाहे । ले तूमन तुंहर सीट म बइठव , पाछू कोती के सीट खाली दिखत हे उही हमर होही – कहिके माई पिल्ला अपन सूटकेस मोटरी – चोटरी ल धर के पाछू डहर रेंग दिन । रमेसर अपमान के घूंट पीके रहिगीस , फेर अपन ददा के सेती मुहूं नि खोलिस ।
गाड़ी चले लागिस । रद्दा म जग-जगा बोर्ड टंगाए रहय , जेमे लिखे रहय , छत्तीसगढिया सबले बढिया । राव के लइका जइसे देखय , जोर जोर ले पढ़य । बेहरा बाबू – राव साहेब आपस में गोठिआए लागिस – हुंह , का खाक बढ़िया ? केवल नारा आय एहा , न लोक में ठिकाना , न रंग में , न संसकीरीति में दम , न सभ्यता म । दई-ददा ल चिपका के घूमत हे आनंद मनाए के दिन म । हमर दाई ददा नइहे का । बहाना बना के छोड़ देतिन , घर के रखवारी घला हो जतिस । इंकर तीर कायेच हे तेकर रखवाली बर कन्हो ल छोड़ही । रहितीस तभ्भो , एमन काहीं के इज्जत करे ल नि जानय । ये छत्तीसगढिया मन , कतको बड़ पद पा जांए भाई साहेब , फेर रही अड़हा के अड़हा । साले परबुधिया मन यहा उम्मर म दई ददा के अंचरा ल धरके घूमथें । खाली दुनिया भर में परचार परसार हाबे कि – छत्तीसगढ़िया सबले बढ़िया । फेर मोला लागथे इंहा कांहीच बढ़िया नइये , तेकर सेती परचार परसार के जरूरत परथे ।
हमर अपन अपन परदेस ल देखथन त , अइसे लागथे के एमन अभी घला पथरा जुग म जियत हे । कोन्हो अपन परदेश के लोक , रंग , संसकीरीति के गुन गावत नई अघात हे , त कोन्हो अपन समरिध्दि के । कोन्हो अपन राज के , दूध दही के नदिया के , बखान करत हे , त कोन्हो मंदिर देवाला के । कोन्हो अपन देसराज ल अनाज के भंडार बतावत नि अघावत हे , त कन्हो खनिज के । चरचा चलत हे जात्रा संग , फेर रहि रहि के छत्तीसगढ़िया सबले बढ़िया के ऊप्पर बियंग घला । अपन देस राज के गुन गवइ ले जादा , लोगन ल इहां के हंसी उड़ाए म मजा आवत रहय । हमर देस राज ल आवन दव , तब देखाबो – काला किथे सबले बढ़िया । सफर के पहिली पड़ाव पुरी पहुंच गे जात्रा दल । रात भर के सफर के थकान उतरे के पाछू , जगन्नाथ भगवान के दरसन बर तियार होवत हे जम्मो झिन । उड़ीसा निवासी बेहरा सेठ भारी उत्साहित रहय । अपन परदेस के गौरव के भारी बखान करत रिहीस । थोरेच समे में एकर सहयोग ले मंदिर के बड़ सुघ्घर दरसन घला पागिन । बेहरा के छाती फूलत रिहीस घेरी बेरी । थोरेच पाछू ओकर पूरा हवा निकल गे । कोन जनी कोन पंडा बनके बेहरा बाबू ल अइसे लूटिस के , पूरा जेबेच सफाचट होगे । जतका डिंगरई मारत रिहीस , जम्मो घुसड़ गे । मजाक या हंसी उड़ई का , बोलती तको कमतियागे | रमेसर ह , ओला बहुत कन पइसा के मदद कर दीस ।




भगवान तिरूपति के दरसन बर अबड़ उछाह रिहीस जम्मो के मन म । जइसे जइसे मंदिर लकठियाये लागिस , मनखे मन के उछाह सरसरऊंवा बाढ़तेच गिस । कन्हो अपन मनौती के बिसे सोंचत रहय , त कन्हो भगवान ल मने मन धन्यवाद देवत रहय । मंदिर तीरेच आये के उमीद म पूजा गाजा के समान बिसाये लागिन । इही म देरी होगे । तभे उदुप ले बरोड़ा सुरू होगे । पानी के बड़े बड़े बूंद चुचुवाये ल धर लिस । डराइबर साहेब आघू गाड़ी चलाये म अपन समसिया बताइस । मजबूरी होगे इही तीर के गांव म समे काटे के । बस के मनेजर समय झिन बरबाद होये कहिके , इही गांव म खाना पीना करे के सोंच डरिस । इसकूल के छपरी देख के बस ल ठाड़ करिस । गांव के कुछ जवनहा मन इसकूल के परछी म बइठ के तास खेलत रहय । मनेजर ह राव साहेब ल , इही लइका मन के मदद मांगे बर भेजिस । मदद त दूर , लइका मन अस डरवइस ओला के , तुरते अपन बस में हांफत हांफत आके बस ल जल्दी चलाये बर केहे लागिस मनिज्जर ल । डराइबर घला ओकर हालत ल देखिस , त पूछिस न गंवछिस , सटासट गेयर लगइस अऊ गाड़ी ल भगइस इहां ले । थोरकुन बेर म राव साहेब बतइस के वो टूरा मन असमाजिक मनखे कस लागिस , उहां थोरकुन बिलमतेन ते लूट पाट हो सकत रिहीस । साले मन मदद त दूर , मुही ल लूटे बर कुदाये ल धरत रिहीन कहिके बताये लागिस । रमेसर के बाबू आके ओकर गिला चूंदी ल पोंछिस अऊ समझइस । जम्मो झिन बसेच म , भगवान तिरूपति के पराथना सुरू करीन , सहींच म देखते देखत बादर कते कोती लुकागे , सुरूज के चमक दिखे लागिस । पानी के बेवस्था देख के खाये पीये के उदिम पूरा करिन , तेकर पाछू भगवान तिरूपति के दरसन बर मई पिल्ला आगू बढ़ गिन ।
सफर के अगले पड़ाव म बेंगलूरू सहर म परवेस कर डारीन । एक ठिन होटल म रूके के बेवस्था रहय । सफर के थकान नि जियानत रहय कन्हो ल । बिरिंदावन गारडन , भव्य बजार जाये के सऊंख म लकर धकर तियार होवत हे । रमेसर कभू देखे नि रहय । वोहा सेसादरी भाई के संगत ल धरीस । दूनों झिन घूम के आबो , तंहंले अपन परिवार ल घुमाहूं सोंच के चल दीस सेसादरी संग । गारडन म सेसादरी भाई हा एक झिन सुघ्घर नोनी के हाथ ल धर दीस । मार परीस रमेसर ल । काबर के उही गलती करीस तइसे सारी बोल पारीस । पछीना छूट गे – रमेसर के । घेरी बेरी छमा मांगिस तब बड़ मुसकिल ले छूटिन । वापिस होटल आये के पाछू सेसादरी भाई ये घटना ल मिरची मसाला डार के बतावत रहय । कतको झिन रमेसर ल गारी दिन । अपन गलती नोहे – बताये के कतको कोसिस करीस फेर , रमेसर के गोठ सुने बर कन्हो तियार नि होइस । कन्हो कन्हो तुरते उलाहना दे बर सुरू कर दीन – इही ल कथे छत्तीसगढ़िया सबले बढ़िया ।




बहुत कष्टदायी होगे जातरा ह इंकर मन बर । देस के व्यवसायिक रजधानी मुम्बई जाये के कन्हो उछाह नि रहिगे मन म अभू । अऊ मनखे मन हीरो – हीरोइन ले मिले बर उत्साहित रहय , त कन्हो चोर बजार ले जिनीस बिसाये बर । कन्हो चौपाटी म मजा ले के सपना देखत रहय , त कन्हो फिलिम सिटी म समे बिताये के । तेकर ले ठाकरे साहेब अऊ जादा उत्साहित रहय । अऊ रहिबेच करही – अपन परदेस के गरब देखाना हे । बड़ घूमिन फिरिन । रंग रंग के जिनीस बिसा डरिन । फेर घूम के आये के पाछू , ठाकरे के बाई के मुहूं तूमा बरोबर लटके रहय । न हूंके न भूंके । पता चलीस – पैसा के थइली चोरी होगे । अऊ ते अऊ , उही म ठाकरे के पर्स , ए टी एम कारड , मोबाइल जम्मो गे । कहींच नि बांचिस । दूनो परानी रोवत बइठे रहय । मंजू अबड़ समझइस । ठाकरे भाऊ भड़क के – तोर होये रितीस त जानते , तेंहा हमन ला लान के दे देबे का , बड़ समझइया बने हस ? मंजू बड़ दायसी ले गोठियात , अपन ए. टी. एम. ल देवत किहीस – जतका जरूरत हे ततका निकाल सकत हव । ठाकरे मंजू के बेवहार ले अवाक रहिगे ।
जात्रा चलत हे । रमेसर के परिवार के हरेक दारी काकको काकरो मदद करके अपन आप ल धन्य अनुभौ करय । तभ्भो ले छत्तीसगढिया सबले बढिया कहिके कन्हो कन्हो कमेंट सुने ल मिलीच जावत रिहीस । मध्यपरदेस पार करत उत्तरपरदेस पहुंच गे । इलाहाबद के संगम म खल खल ले नहा धोके बिहार कती जावत रहय बस । रात के दू बजे । नींद अपन बांहा म पोटारे हे सबो मनखे ल । बिधुन चलत बस , उदुप ले ठाड़ होगे । सुनसान जगा , हड़बड़ा गे , सुकुरदुम होगे । कुछू समझतीस तेकर आगू , चारो मुड़ा ले कोलिहा निही मनखे के भाखा सुनई दे लागिस । कन्हो डराइबर या मालिक ल पूछतीन तेकर पहिली समझ गे , डाकू मन छेंके रहय । बस ले उतार दीन जम्मो झिन ल , बस म चढ़के तलासी ले डरीन । मोबाइल , पइसा , ए टी एम कहींच नि बांचीस । गहना गुठा तको उतरवा लीन । पूरा लुटागे । तुरते भगागे लुटइया । अपन कस सुसवाये धीरे धीरे बस म चघत हे फेर । लोग लइका के हियाव करत , फेर अपन अपन सीट म बइठ गे । जइसे तइसे बस रेंगे लागिस । पोहाये के अगोरा म रथिया बीतत हे । दू पहर बांचे रथिया , जुग ले बड़का होगिस । बैजनाथ बाबा के दरसन करबो , भात बासी खाबो अऊ निकलबो – इही जोजना बांचे रहय । कोन जनी कइसे पूरा होही । तभे मालिक बतइस के सिरिफ एक टेम के रासन बांचे हे , अभू काये करना हे बतावव । बिहारी बाबू श्रीवास्तव जी केहे लागिस – इहीच तीर हमर भाई के घर हे , चलो उंहे जाबोन , खाये पिये अऊ आघू जाये बर पइसा कौड़ी के बेवस्था हो जही । मई पिल्ला खुस होगिन । सिरीफ छत्तीसगढ़िया थोरेन बढ़िया रिथे जी ‌- श्रीवास्तव के बियंग बान रमेसर कोती चलगे । रमेसर हरेक दारी मन ला मार के रहि जाये , कहींच जवाब नि दय । रमेसर के दई पोलखा म लुका के धरे पइसा ल हेरत श्रीवास्तव बाबू ल किहीस – तुंहर भई घर जाबोन त , दुच्छा थोरिन जाबो , ये पइसा के खई खजाना बिसा डरव , सगा जाबे त लइका मन निहारथे झोला ल । श्रीवास्तव संग कतको झिन उतर गिन पानी पीये बर । खई लेवत भेंट होगे इंकर भई संग । सबो गोठ घला होगे इहीच करा । अपन घर लेगही कहिके , खई ल घला दे डरीस , फेर वोहा एक्को घांव अपन घर जाये बर नि किहीस , खई ल धरीस , अऊ जरूरी बूता म जाना हे – कहिके , टरक दीस । चुचुवागे सबो ।
भगवान परीकछा लेवत हे बेटा । तूमन चिंता झिन करव । बैजनाथ बाबा के दरसन करबो , उही हमर वापसी ल सरल बनाही ‌- रमेसर के ददा के अइसन गोठ कन्हो ल नि सुहावत हे । एक झिन कहत रहय – पइसा कौड़ी कहींच निये , खाये पीये बर रासन निये , लइका मन तरस जही , तोला काहे डोकरा……. याहा उम्मर म घूमे के उसरथे । तूमन चलव तो , भगवान सब पूरा करही । बस के मालिक घला उनिस न गुनिस , सियनहा के बात मान के चल दीस । बाबा के दरसन होगे । एक टेम के बांचे रासन ले कलर कलर करत पेट कहां भरही । काकरो पेट नि भरीस । झारखंड नहाके के समे पेटरोल सिरागे । अभू अऊ बड़े समसिया …… । मुड़ धरके बइठ गे । मनिज्जर बतावत हे – पेटरोल पम्प तीरेच म हाबे बबा , फेर का काम के ? पइसा निये एको कनिक । सियनहा ल बखाने लागिन कतको झिन मई लोगन । तोरे सेती वो पार गेन , वोती नि जातेन त कइसनो करके छत्तीसगढ त पहुंच जतेन । अभू का करे जाये …….. । मुड़ी खजवात सोंचत , पेटरोल पम्प के मालिक करा गोठियाये अऊ किलौली करे बर चल दीन । नान – नान नोनी बाबू के रोवई गवई ल बताबो तंहले , पेटरोल पम्प के मालिक पसीज जही अऊ जरूर हमर मदद करही । तुंहर कस कतको झिन तीरथ जात्री मन रोजेच आवत – जावत रिथे , मेंहा खैरात म बांटे धर लुंहू , त धंधा कइसे करहूं । कहींच किलौली काम नि अइस । तुंहर करा सोन चांदी होही तिही ल दे दव । कहां ले देबो बाबू , सब ल लूटके लेगे हे डाकू मन । रमेसर के छोटे बेटा अपन दादू संग पाछू पाछू पेटरोल पम्प म पहुंचे रहय । पेटरोल पम्प मालिक के गोठ सुनके नानुक लइका अपन गला ले सोन के चैन उतारिस अऊ अपन दादू ल देवत पेटरोल भराये बर केहे लागिस । पेटरोल भरागे , फेर ये चैन कइसे बांचिस सोंचत रहय , तभू दादू ल सुरता अइस , डाका के बेरा लइका , बसे म सुते रिहीस , अऊ डाकू मन लइका के गला म फकत कारी पोत समझ के ओकर जांच परताल खाना तलासी नि करीन ।




गाड़ी के पेटरोल भरागे । मनखे के पेट म मुसवा हमागे । भूख के मारे हाल बेहाल हे । पोट पोट करत हे । रमेसर के दई , अपन मोटरी ल डर्रा-डर्रा के हेरीस । दस बारा दिन पहिली , कतको झिन ल खवाये बर , दे के परयास करे रिहीस , कोन्हो नि खइन । नाक मुंहू ल एती वोती करीन । एक झिन मई लोगिन खिसियात केहे रिहीस – अतेक मइलहा फरिया म लपेट के धरे हस , कोन खाही ऐला । टीपा म आने आने फरिया म ठेठरी , खुरमी , कटवा , खाजा , बिड़िया रोटी ल लपेट के धरे रहय । दई के उही खई अभू अतेक मिठावत रहय ….. झिन पूछ । पेट भरगे , जी जुड़ागे । गाड़ी निरबाध चलथे । रोटी नि चलिस । फेर हमागे भूख बैरी ।
छत्तीसगढ़ के सीमा लकठियाये लागिस । पेट के मुसवा के पदोना अऊ बाढ़गे । झारखंड पार करत अऊ कतको गांव गंवई परीस । फेर काकरो हिम्मत नि होइस , सहायता मांगे के । तभे , बड़े जिनीस बोर्ड दिखीस – छत्तीसगढ़िया सबले बढ़िया । रमेसर के ददा डराइबर के बाजू म आके बइठगे , अऊ डराइबर ल केहे लागिस – पहिलीच गांव परही तिहींचे ठाड़ करबे , कुछु न कुछु वेवस्था करबो । हांसिन कुछ मन , गजब वेवस्था कर डरही तइसे गोठियाथे डोकरा । रसता भर अतेक पियार अऊ सहयोग करे के पाछू घला , कतको झिन रमेसर के परिवार ल नि समझ पइन । दम ले पहुंच गे एक ठिन नानुक गांव । रोक … रोक …. इही करा । इंहीचे बेवस्था होही । नान नान झोपड़ पट्टी के बने घर कुरिया म रहवइया मनखे काये मदद करही । खुदे मरत होही खाये पीये बर , हमन ल काला दिही – कानाफूसी गोठियाथे लोगन ।
बर रूख करा छांय देख , बस ल ठाढ़ करीस । गांव के मनखे मन , बर रूख के तरी म , गराम सभा के बईठका सकलाये रहय । बस ल ठाढ़ होवत देखिस त उहू मन अपन अपन जगा म ठाढ़ होगिन । मनखे मन ल , बस ले उतर के अपन कोती आवत देखिस , त उहू मन बस कोती अइन । कुछ जातरी मन के मन म डर हमागे , जतका बांचे हे तहू झिन लुटा जाये कहिके । जइसे तीर म गीन , गांव वाला मन हाथ जोर के जोहारिन जम्मो झिन ल । रमेसर के बाबू के उमर देख के पांव घला परीन । पानी पिलइन , लिमऊ के सरबत घोर डरिन । गोठियात बतात जइसे पता चलीस के , एमन तीरथ बरथ करके आवत हें – मई लोगिन मन घला जुरियागे , चरन पखारत अपन भाग ल संहराये लागिन । तीर के इसकूल म माई मन के नहाये बर पानी के बेवस्था कर डारिन । पुरूस जात मन तरिया म नहा डरीन । इंकर नहा धो के तियार होवत ले , बर तरी , दार – भात – साग सब चुरगे । मसूर संग सेमी , भांटा अऊ आमा के खुला , डुबकी कढ़ही , उरिद के दार लसून धनिया पीस के , अऊ रसहा चेंच भाजी अदौरी बरी मिंझरा , माड़ी भर झोर में मुनगा – रखिया बरी – काला खाये काला बचाये तइसे होगे । ररूआ सपनाए दार भात – कस इसथिती होगे । कसके झेलीन । अऊ ले लौ ….. एक कनिक अऊ ले लौ …… थोरेच कुन मोर कोती ले ……. कहिके अतेक परेम से आगरह करके खिलइन पिलइन के , जात्रा के जम्मो दुख कोन जनी कते करा हरागे । इंकर भात ह एक कोती पेट ल छकाबोर करीस , त दूसर कोती परेम – मया हा , इंकर हिरदे ल सराबोर कर दीस ।
भात खाये के पाछू जानिन के , रमेसर के बड़े बाबू निये । खोजा खोज माचगे । तभे , आमा चुचरत आवत दिखीस । पोटार के रो डरीस मंजू । मां , अब्बड़ भूख लागथे । गांव के डोकरी दाई खाये बर पछवाये रहय , ओकरे बांटा के आधा ल दीस , तइसने म एक झिन मंगइया , घोसरत घोसरत भूख म बिलबिलावत पहुंच गे तीर म । डोकरी दाई सुरू कर डरे रहय । लइका हाथ गोड़ धो के जइसे बइठिस , देख पारिस मंगइया के छटपटई । तुरते ….. मोला भूख निये मां …. मेंहा बगीच्चा म बड़ अकन आमा चुचरे हंव , भात साग ल मंगइया ल देवा दीस । जात्री मन के आंखी ले आंसू धार बनके निथरे लागिस । रमेसर के परिवार के तियाग , सेवा अऊ तपसिया के कायल होगिन जम्मो । मुड़ी ल गड़ाये , अपन करनी के पसचाताप करत सुबकत रिहीन । रमेसर के पूरा परिवार के परति किरतग्यता के भाव रहि रहि के हिलोर मारे लागिस । ठाकरे के मन के भाव जुबान तक पहुंचीच गे । केहे लागिस – हमन रद्दा भर तुंहर हंसी उड़ाएन , तूमन ल परेसान करेन । अपन परदेस के बड़ तारीफ करेन , फेर असलियत इही आय , जेला सबो देखेन , अऊ अभू देखतहन । इहां के मान सम्मान आदर सत्कार ल जिनगी भर नि भुला सकन । गांव के गरीब मनखे मन जेन आत्मीयता ले हमर सुवागत करीन येहा मरत ले नि भुलाए । वाजिम में छत्तीसगढ़िया सबले बढ़िया आय । फकत नारा नोहे , सचाई इही आय । समरथन म थपड़ी पीटे लागिन बाकी जात्री मन । सरपंच खड़ा होके केहे लागिस – हमर फरज आय , सगा के सेवा करना । फेर तूमन तो तीरथ बरथ ले घला आवथव । तुंहर चरन धोके हमूमन तरगेन । तुंहर सुआगत म कोन्हो गलती होगिस होही ते हमन ल छिमा करहू ।




बिदई के समे आगे । जात्री मन बड़ भावुक रिहीन । लाल चहा के अगोरा संग गोठ बात चलत रहय । गांव के सरपंच , रमेसर के बाबू ल अपन सम्बोधन म , ममा कहत रहय । एक झिन ल भरम होगे के , येहा सहीच म एकर भांचा आये का ? रेहे नि गीस , पूछ पारीस । नही बेटा – हमर राज के रिवाज आय , दुनिया के हरेक मानुस संग अपन रिसतेदारी बना डरथन । ये बाबू ल न में कभू देखे हंव , न जानत हंव । अऊ यहू मोला कभू नि देखे या जानत हे । फेर मनखे यहू आय अऊ मनखे महू आंव , इही ल दूनो झिन जानत हाबन । तभे सरपंच बीच म बोलत , बताये लागिस – ये फकत हमर परदेस के संसकार नोहे ममा । में हा बतावथौं आप मन ल , आप मन बर पानी लनइया तेलगू आय , जे लिमऊ के सरबत घोरत रिहीस ते कन्नड़ आय । तुंहर चरन पखरइया कतको झिन महतारी मन उड़ीसा , झारखंड अऊ उत्तरपरदेस बिहार के रहवइया आय । तुंहर बर साग भात रंधइया मराठी आय । तुंहर गोड़ दबइया , जूठा उठइया , बरतन मंजइया घला इहां के मूल निवासी मनखे नोहे । फेर इंकर संसकार अतका सुंदर हे के , एमन ल अतिथि के सेवा करे बर , कन्हो काम म लाज बीज निये । हां भांचा तैं सिरतोन कहत हस । मोर जम्मो संगवारी मन घला , बहुतेच संसकारी परदेस के निवासी आय । जात्रा के बेरा म जेन गलती होइस या जेन बुरा बात होइस , ओमे वो परदेस के संसकार के कन्हो दोस निये । उड़ीसा म लुटइया पंडा उड़िया होइच नि सकय । तूफान म हमन ल अपन ठऊर म रूकन नि देवइया हमर हितवा होही । ओहा हमन ल सावधान करत रिहीस । बंगलोर म अपन गलती के सजा पाये हन हमन । बम्बई म हमर लापरवाही आय , कन्हो लूटे बर नि आये रिहीस हमन ल । बिहार – उत्तरपरदेस के सीमा म लुटइया मनखे उहां के नोहे , ओमन बाहिर के आये जेमन ओ परदेस ल बदनाम करके राखे हे । वाजिम म देखे जाये , त उन परदेस , हमर परदेस ले कतको अगुवा हे अऊ बेहतर घला । फेर असमाजिक मनखे मन के जमावड़ा उन ल बदनाम करे हे । येहा हिंदुस्थान के माटी आय भांचा – जिंहा परेम , भाईचारा अऊ सौहार्द – नदिया कस बोहावत हे , जेन ल जतका मन ततका झोंक लौ । हां एक बात जरूर कहूं के मोर छत्तीसगढ़ के संगवारी मन , अभू जेन सेवा करीन , ओकर बर मय किरतग्य हंव । येहा कन्हो एहसान थोरेन आय ममा , हमर परम्परा अऊ फरज आय – सरपंच जवाब दीस ।
चहा चुंहक डरीन । जाये के समे होगे । फेर काकरो गोड़ नि उठथे । इंहींचे बस जतीस तइसे लागत रहय जम्मो ल । माथ म तिलक लगा के नरियर अऊ दरव्य दकक्षिना घला भेंट करीन । बस में बइठे अऊ सीट पोगराये के होड़ परागे । अभू नावा होड़ माचगे – रमेसर अऊ ओकर परिवार के तीर बइठे के । रमेसर के ददा दाई मन , डोकरी डोकरा ले कका – काकी होगे । जम्मो मनखे अपन करनी बर माफी मांग मांग के अपन पाप धोवत रहंय । अभू घला चरचा चलत रहय छत्तीसगढ़ियाच के , फेर चरचा के सरूप बदल गे । कन्हो कहत हे – वाजिम म इहां के मनखे बढ़िया होथें , काबर एमन केवल अपन परदेस के निही , जम्मो देस के बात करथें । कन्हो कहत रहय – इहां के मनखे भारत ल छत्तीसगढ़ अऊ छत्तीसगढ़ ल भारत समझथें , अऊ कन्हो भी गिरे परे अटके भटके ल अंगिया लेथें , तभे कन्हो परदेस के मनखे असानी ले घुल मिल जथें । अभू बोर्ड , सड़क ले जादा इंकर दिल म जगजगाये लागिस के – सबले बढ़िया छत्तीसगढ़िया ।

हरिशंकर गजानंद प्रसाद देवांगन
छुरा
🔊 ये रचना ला सुनव

The post सबले बढ़िया – छत्तीसगढ़िया appeared first on गुरतुर गोठ Chhattisgarhi.

चरवाहा मन के मुखिया ह अतराप भर के चरवाहा मन के अर्जेन्ट मीटिंग लेवत समझावत रहय कि ऊप्पर ले आदेष आय हे, अब कोन्हो भी बछरू ला डराना-धमकाना, छेकना-बरजना नइ हे बस अतके भर देखना हे, ओमन रोज बरदी म आथे कि नहीं? बरदी म आके बछरू मन कतको उतलइन करे फेर हमला राम नइ भजना हे। जउन बछरू बरदी म नइ आवत हे ओखर घर में जाके ओला ढिल के लाना हे अउ भुलियार के बरदी म रखना हे। ओमन चाहे तुमन ला लटारा मारे, चाहे हुमेले। तुमन ला कहीं नइ कहना हे भलुक प्यार से समझाना हे, अइसना नइ हुमेले बेटा। सींग म पेट ला लाग जथे गा। ज्यादा उतलइन नइ करे जी, श्रीमान हो। महोदय मन अतेक काबर अतलंग करथो रे, बाबू हो। बस अइसनेच समझाना हे। न कोन्हो ला हुदरना हे, न काखरो बर लउठी उबाना हे अउ न हर्रे कहिके बरजना हे, इहां तक कि कोन्हो ला लाल आंखी तक नइ देखाना हे अउ न कोन्हो ला करू भाखा कहना हे। कोन्हो भी बछरू कोती ले तुंहर षिकायत मिलही तब तुहर जेवर पानी ला बंद कर दे जाही, समझगेव? अतका समझाय के बाद तुमन नइ मानहूं तब तुम जानो अउ तुहर काम जाने।




मुखिया के गोठ ला सुन के सब चरवाहा एक-दूसर के मुँहूं ला देखे लगिन। सबो झन मने-मन गुनत रहय। बड़ा मरना हे यार! संसार के सबो जीव ह ननपन में जउन बात ला सीखे-पढ़े रथे ओखरे असर जिनगी भर रथे। अइसना नियम में हमर नान-नान बछरू मन उजड्ड हो जही। कहीं नीति-नियम ला न तो जानही अउ न बडे बाढ़ के मानही। फेर हमन ला काय करना हे ददा, जेवर-पानी के सवाल हे। जेवर पानी बंद हो जही तब पेट बिकाली म हमी मन मर जबो, तेखर ले जइसे ऊप्पर ले आदेष आय हे, वइसनेच करे में भलाई हे।
बरदी के नियम कानून ह ढिल्ला होइस तहन सब बछरू मन मनमाने उतलइन होगे। बछरू के गोसान मन सोचे कि चरवाहा मन अलाल अउ कोढ़िया होगे हे। फोकट के जेवर पाके मेछरावत हे अउ खेत म कनिहा तोड़ के कमइया सियान-सियान बइला मन अपन बछरू मन के भविश्य ला सोच के रातदिन संषो-फिकर म बुड़े रहय। ओमन मने मन गुनय कभू हमू मन बछरू रहेन तब हमर गोसान नहीं ते चरवाहा ह हमर असन दु झन बछरू ला जोड़ के एके संघरा रेंगें बर सिखोवय। नांगर म फांद के अघुवा बइला मन के पाछू-पाछू खेत म नांगर के हरिया म रेंगावय। दौड़ी म फांद के सब सियान मन संग रेंगे बर सिखोवय। लइकापन म हमन कोन्हो बरदी के नियम-कायदा ला तोड पारन तब छेके बरजे, फेर आजकल अइसन का होगे कि चरवाहा मन कछु बोलबे नइ करय।
येती छेल्ला पाके बछरू मन गजब लाहो ले लगिन। जब मन होवय तब बरदी ला भाग जावय। काखरो बारी बखरी म खुसरके बेन्दरा बिनास कर देवय। उखर मन में डर नाम के कोन्हो बातेच नइ रहिगे। सबे बछरू मन हरहा होय लगिन। हरहा बछरू मन कभु रखवार के सपेटा म पड़ घला जाय अउ कांजी हाऊस म धंधाय के सजा मिल जाय तब रखवार तीर तुरते गोल्लर साहब के सिफारिष आ जाय। गोल्लर साहब के डर के मारे रखवार मन तुरते हरहा बछरू मन ला कांजी हाऊस ले छोड़ देवय। गोल्लर साहब के परताप ला देख-सुन अउ समझ के बछरू मन के मन में बस गोल्लर बने के साध रहय। कभु-कभु बछरू मन अपन जहुंरिया संगी-साथी मन संग गोठियावय कि भुंकरे वाला गोल्लर बनना चाही कि आषिरवाद दे वाले गोल्लर। जिनगी के मजा इही दुनो किसम के गोल्लर बने म हे। जउन बछरू ला आषिरवाद दे वाले गोल्लर बने के साध रहय वोहा नंदिया बइला ला अपन गुरू बना लेवय अउ जउन ला भुंकरे वाले गोल्लर बने के सउख रहय ओमन भुंकरे वाले गोल्लर के आघू-पाछू किंजरय। उखर इषारा म बेन्दरा बरोबर नाचय।
गोल्लर साहब के आघू-पाछू नाचत-नाचत जब एक झन बछरू जवान होगे तब मउका देख के वोहा एक दिन गोल्लर साहब ला कही पारिस-‘‘अब तो आप मन सियान होगे हो। भुंकरे भर ला सकथव तुहंर गतर तो चले नही। अब हमू मन तो गोल्लर बने के मौका देवव साहब।




बछरू के गोठ ला सुन के गोल्लर साहब भड़क गे। कहिस-‘‘तुमन गोल्लर बने के लइक दिखथव रे। नाक बोहावत हे तेला पोछे के ताकत नइहे अउ बड़े-बड़े सपना देखथव। तुमन हमर धरम अउ पारटी के झंडा ला उठा के जिन्दाबाद कहत भुंकरव। जउन ला मन लागे तउन ला हुमेलव। जेखर बारी-बखरी ला रउंदना हे रंउदव। कोन्हो रखवार छेकही बरजही तब हमला बतावव। हमर रहत ले कोन रखवार के हिम्मत हे जउन तुंहला कांजी हाऊस म धांध सके। बस गोल्लर बने के साध झन करव नहीं ते अइसे हकन के लटारा जमाहूं कि जिनगी भर बर गोल्लर बने के साध ला बिसर जाहू, समझ गेस?
हमर रहत ले तुमन ला गोल्लर बने के अधिकार नइहे। हमर बाद हमरे पिला-पागड़ू मन गोल्लर बनही। ओखर बाद उखर पिला मन गोल्लर बनही। ओखर बाद—। तुंहर काम सेवा करना आय अउ सेवा के बदला ला मेवा पाके मजा उड़ाना हे, समझेस?
फेर ये पइत तो वो बछरू के दिमाग में गोल्लर बने के भूत सवार होगे रिहिस। वोहा गोल्लर साहब के बात ला समझबे नइ करिस अउ अपन जिद में अड़े रिहिस। गोल्लर साहब के दिमाग खराब होइस तब वोहा वो बछरू ला अइसे जमा के लटारा हकनिस कि बछरू ह सोझे पषु औशधालय के आधू में जाके गिरिस।
भकरस ले आवजा ला सुन के अस्पताल के भीतरी में खुसरे डॉक्टर झकनाके खोर डहर दौडिस। देखिस, बछरू उतान पडे रहय। डॉक्टर ह तीर में आके पूछिस-‘‘आपके आगमन कहाँ ले होवत हे बछरू बाबू? सुनके बछरू बगियागे। ओखर एड़ी के रिस तरवा म चढ़गे। वोहा किहिस-‘‘दिमाग खराब झन कर यार! सोझ बाय मरहम-पट्टी कर अउ सूजी पानी दे। डॉक्टर ह मरहम -पट्टी करे लगिस फेर बछरू ह कनिहा पीरा म हकरत-हकरत गोल्लर भैया जिन्दाबाद के नारा ला लगातेच रहय।

वीरेन्द्र ‘सरल‘
🔊 ये रचना ला सुनव

The post व्यंग्य : बछरू के साध अउ गोल्लर के लात appeared first on गुरतुर गोठ Chhattisgarhi.

जनम लेवइय्या ये भुंइया म,सिरतो कथंव भागमानी ए।
धुर्रा माथ लगावव संगी!ये माटी बलिदानी ए।

जनम धरिन कौसिला दाई
रामलला के महतारी।
बालमिक रमायन रचिस
महिमा ह जेकर बड भारी।
राजा दसरथ रेंगत आइस,इंहे सिंगी रिषी बरदानी हे।
धुर्रा माथ लगावव संगी!ये माटी बलिदानी हे।

बारा बच्छर बनवास कठिन
राम-लखन इंहे काटे हे।
जूठा बोईर सबरी के खाके
नवधा भगति ल बाँटे हे।
अंग-अंग राम नाम गोदवइय्या,कतको इंहा रामनामी हे।
धुर्रा माथ लगावव संगी!ये माटी बलिदानी हे।

धरती ए ,बेटा ल आरा म चिरइय्या
मोरध्वज अस दानी के।
बबरूवाहन अर्जुन के लइका
पराकरमी धनुषधारी के।
बन-बन किंजरय पांडो मन जिंहा,वो भीमखोज-खल्लारी ए।
धुर्रा माथ लगावव संगी!ये माटी बलिदानी ए।

इंहे के डोंगरी पहाडी म
कालिदास मेघदूत ल रचे हे।
रामगिरी डोंगरी ;भरत मुनि के
नाचा-लील्ला खातिर सजे हे।
नाचा के नाव जगइय्या,इंहा मंदरा जी कस धियानी हे।
धुर्रा माथ लगावव संगी!ये माटी बलिदानी हे।

अंगरेज मन ल खेदे-बिदारे
बीरनारायण बघवा के।
ए भुंइया हरे छुवाछुत भगइय्या
सुंदर बबा जइसे अघवा के।

सुराजी मसाल जरइय्या मन के, बगरे चारों खुंट कहानी हे।
धुर्रा माथ लगावव संगी!ये धरती बलिदानी ए।।

रीझे यादव
टेंगनाबासा (छुरा) 493996

The post छत्तीसगढ़ महिमा appeared first on गुरतुर गोठ Chhattisgarhi.

भारत देस तिहार अउ परब के देस हरे।अउ हमर छत्तीसगढ़ म तो बरमस्सी परब रथे।आनी-बानी के तिहार मनाथन हमन इंहा।पहिली सिरिफ पुरखा के बनाय तिहार मानत रेहेन फेर धीरलगहा संडे तिहार,चांउर तिहार,रुख-राई तिहार,भेलेनटाईन तिहार ,बिकास तिहार अउ एसो बोनस तिहार ल घलो मनाय बर सीखेन।अउ जेन मनखे संझौती बेरा पाव भर चढा लेथे ओकर बर तो रोज दिन तिहार हरे।अभीचे देवारी अउ बोनस तिहार संघरा मनाय हन ।वइसे देवारी तिहार तो हर बच्छर आथे फेर बोनस तिहार पांचसल्ला हरे।अभी तक देखब म आय हे कि ए तिहार ह चुनई तिहार के बच्छर भर पहिली आथे।एसो बोनस तिहार के गरह-नछत्र बइठिस काते!साल पुट अवइय्या देवारी तिहार म गजब उछाह रथे त पांचसल्ला परब के तो बाते झन पूछ!!




बडे बिहनिया ले जुगरू भइया नहा के तियार होगे रहय।मेंहा जान डरेंव कि एहा बोनस झोंके बर अतेक संवागा करे हवय।बिहनिया ले जेकर आंखी म ठोमा भर चिपरा राहय तेकर आंखी आज मार एलीडी बलफ बरोबर जुगुर-जुगुर बरत राहय।आज तो ओहा बरम मुहूरत म अस्नान कर डरे रिहिसे काते।
तरिया डाहर नहाय बर जावत रेहेंव त एकझन कका बाट म अमरागे।ओहा लकर-धकर के मारे अपन कपडा ल तरिया म भुलाके आगे रहय।मोला देखके कथे-मोरो बनयई ल ले आनबे बेटा!!बोनस तिहार के चक्कर म भुला गेंव।अतका बता के ओहा रेंग दिस।में ह सोचेंवअतका निसा हे मनखे ल बोनस तिहार के कि पागी-पटका के सुध नइहे।
थोरिक देर म का देखथंव पुरा के पूरा गांव ह कचरा बरोबर टेक्टर म जोरा के बोनस तिहार देखे बर जावत राहय।एक झन मनखे ह पोट-पोट करत सियनहा ल बरपेली फटफटी म बइठार के लेगत राहय।में ह एक झन कका ल पूछेंव- कका!ये हा कोन हरे ग?अउ बरातू बबा ल काबर लेगत हे?
ओहा बताइस-ओहा बरातू के दमांद हरे ग!डोकरा के एको झन बेटा नइहे।एके झन बेटी अउ दमांद हवय।ओकर बेटी ह डोकरा ल लेगहूं किहिस त ओकर इही घरवाला ह नी राखन कहि दिस।डोकरा ह खेत खार ल रेगहा बेंच के अपन गुंजाइश चलाथे।ओकरे खाता म उंकर रेगहा वाला मन ह अपन धान ल बेंचथे।पाछू बच्छर घलो धान बेचाय रिहिसे।ओकरे बोनस बर तो आय हे ललचाहा दमांद ह।
कका के गोठ ल सुनके सोंचेंव।वा रे मनखे!सिरिफ सुवारथ के संगी हरे मनखे के जात ह!जब कखरो ले फयदा होही त कुकुर बरोबर आगू पाछू घुमही अउ सुवारथ पूरा होय के बाद उही ल लात मार देथे।




सरकार ह मनमाने परचार करत हे बोनस तिहार के।मुठा-मुठा पइसा धरे मनखे छकत ले खावत -पियत हे।सरकार के पइसा फेर घूम फिर के सरकार कना जावत हे।जेन दिन ले बोनस के पैसा मिलत हे दारू भट्ठी म कुंभ मेला सरीख भींड चलत हे।
दरुवाहा मन जघा-जघा परे हवय।स्वच्छता अभियान के मारे बिटाये कुकुर मन इंखरे आजू -बाजू म बईठ के ओमन ल चांटत रथे।गांव के माहोल बिचित्र होगे हे।कतकोहोन मनखे के थोथना ओरमे हे काबर कि ओमन पर के खाता म धान बेंचे हवय।उंकर बोनस बूडगे।कतको पर के धान ल अपन खाता म बेंचे हे तेकरे सेती अंटिया के रेंगत हवय।पूरा बोनस सिरफे उंकर होगे रहय।
जेन बेपारी मन किसान के खाता म कमीसन देके धान बेचे रिहिन तेमन बोनस के थोक-बहुत पैसा के आस में किसनहा के आगू पाछू रेंगत रहय।कमीसन खाके माटी महतारी अउ सासन के संग गद्दारी करइया मनखे मन फोकट के पैसा ल मिहनत के पैसा बरोबर चिमोट के राखे रहय।सही म पैसा पैसा होथे।चाहे ईमान के हो या बईमानी के।तुरते हांथ ले नी छूटे।दू झन ललचाहा के लार फोकट के पैसा बर लामे रहय।बेपारी ह दोगलई करत धन बनावत हे।कमीसनखोर कमीसन लेवई म मस्त हे।जनता पीयई-खवई म बियस्त हे।सासन करजा लेवई म पस्त हे।फेर का करबे?जम्मो के खुसी के सवाल हे।
एक झिन बबा ल पूछेंव-कस बबा!तेंहा बोनस तिहार नी मनावस ग?




ओहा अपन आंखी ले आंसू पोंछत किथे-का तिहार मनाहूं बेटा!पाछू बच्छर मोर छोटे बाबू ह बीमार परे रिहिसे।ओकर बांटा खेत-खार के जम्मो धान ल बेंचके ओकर इलाज करायेंव।सुसयटी म बेंचे ले जम्मो पैसा उधारी म कट जाही अउ तुरते पैसा के जुरूरत के सेती औने-पौने भाव म बेपारी कना धान ल बेचेंव।तभो ले ओला नी बंचा सकेंव।परिहार साल के बोनस ह समे म मिले रतिस त को जनी ओकर परान कहूं बांच जतिस?फेर का करबे नी मिलिस।खातू-कचरा के करजा म लाद के अपन बनौकी बना डरिस अउ मोर टोंटा के फांसी होगे।एसो के धान-पान म ठिकना नीहे त बोनस के का उम्मीद करहुं।
बडका बाबू ल कतका बोनस मिलही ते उही जाने!फेर ओहा तो रोज कोठी के धान ल बेंच के मनमाने दारू पीयत हे।ओकर बर तो रोजेच तिहार हवय।बोनस तिहार ह तो ओकर बर अउ मजा हो जही!!पी-खाके आही अउ घर ल दंदोरही।
बबा के गोठ ल सुनके मोरो आंसू चुहिगे।मोला लहुटत खानी बबा चेताइस-ए कलजुग हरे बेटा!कोनो कखरो बर फोकट म कुछू नी करय।किसान ह उपराहा धान पाय बर खेत म धान छीतथे अउ ओकर जतन करथे वइसन ढंग ले नेता मन उपराहा बोट पाय बर बीजहा छीतथे।किसान अपन फसल म खुस रिथे ।नेतामन अपन फसल म खुस रिथे।

रीझे यादव
टेंगनाबासा(छुरा)493996
🔊 ये रचना ला सुनव

The post व्यंग्य : सरकारी तिहार appeared first on गुरतुर गोठ Chhattisgarhi.

गजब जिनिस ए सीडी संगी
समाये इही म जम्मो संसार
काकरो बर ये धन दोगानी
काकरो बर ये हरे तलवार!

देश बिदेश के परब संस्कीरति
देखाय बताय सब ल उघार
मनरंजन बर घर घर आए
धरके बिडियो सनीमा अवतार!

छोटे बड़े सब आपिस मन म
कागज पत्तर के कम होगे काम
जब ले बगरे ए बहुत गुणकारी
जम्मो लेवत हे एकरेच नाम!

हितकारी सरकारी ओजना ह
चारो कोति इही म बगरथे
जइसन काम के वइसन परणाम
पानी म हागबे जरूर उफलथे!

कहिथें तेलघानी राजधानी
अउ कहिथें संस्कारधानी
देखत सुनत हन रे भईया
कातिक म होवत पानी पानी!

बाढ़य जतेक बिकास के डोरी
नीति धरम जावत हजात हे
सबो ल हे सुवारथ संसो
बेरा म अधरमी ल घलो बचात हे!

कोनो ल कराये हपका दपका
कनहो ल पराये गारी मार
कनहो ल बइठारे राज सिंहासन
हे सीडी तोर महिमा अपार!

ललित नागेश
बहेराभांठा (छुरा)
गरियाबंद(छ.ग.)
🔊 ये रचना ला सुनव

The post छत्तीसगढ़ी कविता : सीडी महिमा appeared first on गुरतुर गोठ Chhattisgarhi.

परकीति बर झिल्ली बिन ईलाज के अजार होगे
जगा जगा पहाड़ कस कचरा के भरमार होगे!

सरय नही गलय नही साग भाजी कस पचय नही
खा के मरत गाय गरूवा एक नही हजार होगे!

जोंक कस चपके एकर मोह मनखे के मन म
घेरी बेरी बंद चालू करत एला सरकार होगे!

लजाथे शरमाथे झोला धर के रेंगे बर जहुंरिया
देखव हाट म हलाकान कइसे खरीददार होगे!

का होही दूए तीन किसम ल बउरे बर छेंके ले
इंहा तो संसार म पलासटिक कई परकार होगे!

कोन जनी कब छोंड़ही पाछु ल ए जग बैरी ह
आज एहा मनखे के पहिचान बर आधार होगे!

नप्फा नकसान सही गलत के गियान हे सब ल
फेर अपन होके जागरूकता बर कोन तय्यार होय हे?

ललित नागेश
बहेराभांठा(छुरा)
गरियाबंद(छ.ग.)
🔊 ये रचना ला सुनव



देख कइसे हांसत हे हमर बारी के पटवा जी
कातिक आगे बाड़गे बुता बइठ के झन गोठिया जी।
अरन बरन तिहरहा बुता म हाथ बटाले
नही ते गोसाईन मारही फेंक के चटवा जी।
का सुघ्घर जतनाये पालपोस बढ़ाये धनहा
उसराले उत्ता धुर्रा जांगर खेत म काटत हे कटवा जी।
पाये हे बोनस पियत हे उछरत पोकरत ले
“हैप्पी दीवाली” बोंबियात घुमात हे दू झिन लठवा जी।
देश परदेस बांस कस सोज सलंगा बाढ़य
मंद मतवारी ह बनात हे छत्तीसगढ़िया ल बठवा जी।

ललित नागेश
बहेराभांठा(छुरा)
४९३९९६

The post छत्तीसगढ़ी गज़ल appeared first on गुरतुर गोठ Chhattisgarhi.

छत्तीसगढ़ के धुर्रा माटी,
माथ म तैंहा लगा ले रे।
थाम के तिरंगा हाथ मा,
वन्दे-मातरम् गा ले रे ।।

बइरी दुस्सासन, ताकत हे आज,
भारत माँ के अँँचरा ल।
डंडा मार के दूर भगाबे,
आतंकवाद के कचरा ल।।
जा बेटा आज,
दूध के करजा चुकाले रे….

राष्ट्र धरम ले बढ़के,
अउ कोनो धरम ईमान नही।
भारत भुंईयां ले बढ़के,
अउ कोनो भगवान नही।।
अपन, कतरा कतरा लहू के
भुईंयाँ बर बहाले रे….

राम कुमार साहू
सिल्हाटी, कबीरधाम
मो.नं. 9977535388
🔊 ये रचना ला सुनव

The post दूध के करजा चुकाले रे appeared first on गुरतुर गोठ Chhattisgarhi.

कातिक पुन्नी के मेला भराय
चल न मयारु घुमेल जातेन
भोले बाबा बर असनान करबो
फुलपान केला जल चढ़ातेन

लगे रथयं अब्बड़ रेला
दरस करके घलो आतेन
फोड़तेन नरियर अउ भेला
मनके मनौती मांग लेतेन

खांसर बईला म बईठके
होहो तोतो हांकत दउंड़ातेन
संगी जहुंरिया संग जोराके
महादेव घाट मेला जातेन

लाई मुर्रा चना फुटेना
खाय बर बिसाके लातेन
लाली लाली पढ़र्री खुशियार
चुहक चुहक के खातेन

आनी बानी के सजे दुकान
खोवा बतासा खरिदतेन
मजा लेबोन ढ़ेलवा रहचुली
संग बईठके झुला झुलतेन

घुमत घामत मजा लेवत
सांझ मुंदिहार घर लहुटतेन
बिसातेव तोर बर चिंन्हारी मुंदरी
पुन्नी मेला के सुरता करतेन!!

मयारुक छत्तीसगढ़िया
सोनु नेताम माया
रुद्री नवागांव धमतरी
🔊 ये रचना ला सुनव

The post पुन्नी मेला घुम आतेन appeared first on गुरतुर गोठ Chhattisgarhi.

हमर हिन्दू धरम मा देवी-देवता के इस्थान हा सबले ऊँच हावय। देवी-देवता मन बर हमर आस्था अउ बिसवास के नाँव हरय ए तीज-तिहार, परब अउ उत्सव हा। अइसने एक ठन परब कारतिक पुन्नी हा हरय जेमा अपन देवी-देवता मन के प्रति आस्था ला देखाय के सोनहा मौका मिलथे। हमर हिन्दू धरम मा पुन्नी परब के बड़ महत्तम हावय। हर बच्छर मा पंदरा पुन्नी परब होथे। ए सबो मा कारतिक पुन्नी सबले सरेस्ठ अउ शुभ माने जाथे । कारतिक पुन्नी के दिन भगवान शंकर हा तिरपुरासुर नाँव के महाभयंकर राक्छस ला मारे रहीन हे तब ले एला तिरपुरी पुरनिमा के नाँव जानथें अउ मानथें। शंकर भगवान ला ए नाँव हा इही दिन ले तिरपुरारी के नाँव मिलीस हे। अइसन मानियता हे के कारतिक मा शिवशंकर के दरसन करे ले सात जनम ले मनखे हा गियानी अउ धनवान होथे। इही दिन अकाश मा जब चंदा उवत रथे तभे सिवा, संभूति, संतती, पिरती, अनसुइया अउ छमा ए छै किरतिका मन के पूजा-पाठ करे ले शंकर जी हा अड़बड़ प्रसन्न होथे। इही दिन गंगा मईया मा असनांदे ले बच्छर भर के असनांद के फल मिलथे। एखरे सेती कारतिक पुरनिमा ला महा कारतिकी पूरनिमा घलाव कहे जाथे।




कारतिक पुन्नी के दिन संझा बेरा मा विष्णु भगवान के मछरी अवतार होय रहीस। ए दिन गंगा मा नहाय अउ दान देके महत्तम हावय। ए दिन नदीया मा नहा के दीया के दान दक्छिना ले दस ठन जग बरोबर फल मिलथे। ब्रम्हा, विष्णु, महेश, ऋषि अंगीरा अउ आदित्य मन हा कारतिक पुन्नी ला महापुनीत परब माने हावय। एखर सेती ए दिन गंगा असनांद करके दीया के दान दे के, हूम-जग, उपास अउ पूजा-पाठ करके विशेष महत्तम हमर धरम ग्रंथ मन मा बताय गे हावय। पूजा-अरचना , दान-दक्छिना अउ जग, हवन ला शुभ बेरा मा संपन्न करे जाय ता शुभेच शुभ होथे।
जौन प्रकार ले हमर पिरिथिवी लोक मा कारतिक अमावसिया के दिन मा देवारी के जगमग तिहार ला मनाथे, ठीक अइसने कारतिक पुन्नी के शुभ तिथि मा देवलोक मा देवी-देवता मन अब्बड़ धूमधाम ले देवारी के उत्सव ला मनाथे। एखर सेती कारतिक पुन्नी के परब ला हमन देव देवारी के नाँव ले घलाव जानथन। धरम ग्रंथ अउ पुरान के हिसाब ले असाढ़ महीना के अंजोरी पाख अकादशी के दिन ले भगवान विष्णु हा चार महीना बर योगनिद्रा मा लीन हो जाथे पताल लोक मा। भगवान विष्णु हा कारतिक महीना के अंजोरी पाख के अकादशी के दिन जागथे तेला देवउठनी अकादशी कहिथे। एखर पाँच दिन पाछू कारतिक पुन्नी के दिन सबो देवी-देवता मन खुशी ले झूम-झूम के भगवान विष्णु संग लछमी जी के आरती उतार के उच्छल मंगल के संग दीया बार के देवलोक मा देवारी मनाथे। हमर पिरिथिवी के देवारी मा भगवान विष्णु के चार महीना के नींद मा रहे के सेती लछमीजी के संग देवता मन के परतिनिधी के रुप मा श्री गणेश जी के आरती उतारे जाथे।
कारतिक पुन्नी ला देवता मन के त्रिदेव ब्रम्हा, विष्णु अउ महेश मन के द्वारा महापुनीत परब के संज्ञा दे हावय। ए दिन गंगा असनाँद, व्रत, उपास, अन-धन के दान, दीया के दान, हूम-जग, आरती-पूजा के विशेष महत्तम बताय गे हावय। धारमिक मानियता के हिसाब इही दिन कन्यादान करे के संतान व्रत हा पूरा हो जाथे। जौन सरद्धालु मन हा कारतिक पुन्नी ले शुरु करके जम्मों पंदरा पूरनिमा के व्रत, उपास राख के चँदा ला जल अरपन करथें। भगत मन सरद्धा अउ सक्ति के अनुसार दान-पान, शुभ कारज करथें ओखर सबो मनोकामना हा पूरा होथे। इही दिन के रतिहा मा दीया बार के, रतिहा जाग के भजन करत, पूजा-पाठ अउ अराधना करना चाही। इही दिन भगवान विष्णुजी के पूजा-पाठ के संगे संग तुलसी पूजा अउ तुलसी बिहाव करे ले घर मा सुख समरिद्धी अउ शांति के भंडार भरथे। कारतिक महीना मा तुलसी बिहाव अउ तुलसी अराधना के विशेष महत्तम हावय।
पुरान मन के कथा मा गुनबती नाँव के एक झन इस्तिरी हा मंदिर के मुहाँटी अउ अँगना मा तुलसी के सुग्घर फुलवारी ला कारतिक महीना मा लगाइस अउ तन-मन ले सेवा करीस। इही गुनबती हा अपन आगू जनम मा सतभामा बनके श्री कृष्ण भगवान के पटरानी बनीस। एखरे सेती कारतिक पूरनिमा के दिन तुलसी पूजा अउ तुलसी बिहाव के बड़ महत्तम हावय। इही दिन तुलसी के बिरवा अउ तुलसी चौरा ला सजाय सवाँरे जाथे अउ भगवान सालिगराम के बिधि-बिधान ले पूजा-पाठ करे जाथे अउ तुलसी बिहाव के उत्सव ला सरद्धा के संग मनाय जाथे।
धार्मिक ग्रंथ के अनुसार द्वापरयुग मा महाभारत के अठारा दिन के लड़ई मा मरे रिस्ता-नता अउ वीर सइनिक मन के आत्मा के शांति बर भगवान श्रीकृष्ण के कहना मा महराज युद्धिष्ठिर हा कारतिक महीना मा जग करीन। ए जग हा कारतिक महीना के अंजोरी पाख के अस्टमी ले चालू होके चउदस तक चलीस। कारतिक पुन्नी के दिन असनांद के पूर्ण आहूति दीन। इही दिन ले अपन पितर मन ला मुक्ति दे बर कारतिक पुन्नी के दिन गंगा नहा के दान-पुन अउ पूजा-पाठ के महत्तम हावय। जम्मों प्रकार के सुख सुविधा, धन-धान के शुभ फल देवइया कारतिक पुन्नी के दिन करे ले पूजा-पाठ, दान-धरम हा सीधा पुन्नी के विधि-विधान ले पूजा-पाठ करे मा मिलथे। इही दिन गंगा असनांद, दीया दान, हवन, जप-तप करे ले ए संसार भर के पाप अउ ताप के नास होथे। ए दिन के करे अनदान, धनदान, कपड़ा-लत्ता के दान, सोन-चाँदी के दान अउ बरतन के दान के घलाव बड़ महत्तम हावय। ए दिन के दिन हा कई गुना बढ़के हमला वापिस मिलथे। कारतिक पुन्नी के दिन मनखे जौन कुछू दान करथे वोहा सरग मा सकलाय रथे अउ मिरित्यु होय के पाछू ए लोक ला तियागे ले सरग मा फेर मिल जाथे। ग्रंथ वेद पुरान मा कहे गे हे के कारतिक महीना पुन्नी कस कोनो दुसर महीना नइ हे अउ गंगा कस कोनो तीरथ नइ हे। कारतिक महीना बरोबर कोनो परब अउ बरत नइ हे जौन इहलोक मा शुभ फल देके संगे संग परलोक बर घलाव शुम आसीरबाद अउ फल देथे।




हमर देश के वाराणसी (बनारस) नगर मा कारतिक पुन्नी के दिन कारतिक पुन्नी के वरत ला देव-देवारी के उत्सव के रुम मा बड़ धूमधाम ले मनाय जाथे। देशभर मा सबले भव्य अउ जबर उत्सव गंगा मईया के तीर मा हर बच्छर होथे। गंगा मईया के तीर मा शंकर भगवान के नगर काशी के जम्मों घाट मा कारतिक पुन्नी के दिन मनाय उत्सव हा हमर देश के सबले बड़े कारतिक पुन्नी के उत्सव होथे। काशी के जम्मों घाट मा एक संघरा अनगिनती के दीया जलथे अउ गंगा मईया के आरती उतारे के दिरिस्य हा बड़ अलौकिक अउ मनमोहना रथे। ए देव देवारी तो देवता मन हा मनाथे फेर एमा हमन हा घलाव दीया के दान देके शामिल हो सकथन। अइसन करे ले हमन ला देवता मन के सद्गुन धारन के बल मिलथे।
कारतिक पुन्नी के दिन संझा समे मा तिरपुर उत्सव करके दीया दान करे ले पुनरजमन के पीरा अउ सबो झमेला झन होय बर गंगा मा नहा के, पितर मन ला जल अउ कुस अरपन करे ले, कपड़ा-लत्ता दान करे के विधि-विधान हावय। घर मा सुख-संपत्ति आथे, कस्ट-पीरा हा दुरिहा भागथे एखर सेती कारतिक पुन्नी के बरत उपास करे के विधान प्राचीन समय ले चले आवत कारतिक पुन्नी के बरत-परब सबो मनोकामना पुरती करइया माने गे हे।

कन्हैया साहू “अमित”
शिक्षक ~भाटापारा (छ.ग)
संपर्क ~ 9200252055
🔊 ये रचना ला सुनव

The post देवता मन के देवारी : कारतिक पुन्नी 04 नवंबर appeared first on गुरतुर गोठ Chhattisgarhi.

हरियर हरियर खेतहार हे ,
धान ह लहलहावत हे ।
सुघ्घर बाली निकले हाबे,
सब झन माथ नवावत हे ।

सोना जइसे सुघ्घर बाली ,
हवा में लहरावत हे ।
अपन मेहनत देखके सब झन ,
मने मन मुसकावत हे ।

मेहनत के फल मीठा होथे ,
‘माटी’ गाना गावत हे ।
धान ल अब लुए खातिर ,
हंसीया धरके जावत हे ।

सबो संगवारी हांस हांस के,
ठाड़ ददरिया गावत हे ।
करपा ल अब बांध बांध के ,
बियारा कोठार में लावत हे ।

महेन्द्र देवांगन “माटी”
गोपीबंद पारा पंडरिया
जिला – कबीरधाम (छ. ग )
8602407353
🔊 ये रचना ला सुनव

The post धान – पान appeared first on गुरतुर गोठ Chhattisgarhi.

अहिल्या हॅं दुये चार कौंरा भात ल खाये रिहिस होही। ओतकेच बेरा परमिला झरफिर झरफिर करत आइस । ओरवाती के खालहे म बैठ गे। अहिल्या देखते साथ समझ गे। परमिला हॅ आज फेर अपन बेटा -बहू संग दू -चार बात कहा -सुनी होके आवत हे। अहिल्या परमिला के नस -नस ल टमर डारे हवय। जब कभू परमिला बेरा -कुबेरा अहिल्या घर आथे। थोथना फूले रहिथे। मुड़ी -चुंदी बही बरन छरियाये रहिथे। मार गोटारन कस बड़े -बड़े आॅखी ल नटेरत ,परेतीन बानी अपने अपन बुड़ुर- बुडुर करे लागथे त अहिल्या फट्ट ले जान डारथे के परमिला काकरो संग होवय लड़ झगड़ के आवत हे। आखिर परोसीन होथे। संग लगाती ससुरार आये हे। घर के मुहाटी जुरे हे। संगे रेगत हे। संगे संग उठत -बइठत हे । एके मुॅह म खावत हे एके कूला म हागत हे त का ओतको ल नइ समझही। जब कभू अइसन बात होथे त परमिला ल बइठे बर कहे ल नइ लागय। वोह खुदे हाथ- गोड़ ल लमा -पसार के बइठ जाथे अउ पसरा बगराके सुनाय लगथे। अपन राम कहानी ल। बिन संदर्भ बिन प्रसंग के । पूछे- पाछे के कोनो नेेंगे नइ राखय । आजो वोइसने होइस।

अहिल्या अॅंचोते -अॅचोवत गोठ के मुहतुर करिस -का साग खाए हस दीदी ?

हारन के बाजत भर के देरी रिहिस हे। भइगे ताहेन का पूछत हस। परमिला के रेलगाड़ी पोंपियावत छुकछुक करत दउड़े लगिस – अइ ….. का खवइ – पीयइ ल पूछथस बहिनी। खाये हवन तभो लाॅघन। नइ खाये हवन तभो लाॅंघन। अतका कहिके परमिला अपने अपन करू करू करे लगिस । मुड़ म हाथ ल रखके अनते कुती मुॅह ल करके अॅंइठत बइठ गे। जना मना अहिल्ये संग अनबन होगे हावय तइसे। मुड़ ल गड़ियायेे भीतरे भीतर आॅखी ल कनखियाके देख तको डारिस के अहिल्या हॅ कुछू बोलत हे के नही ।

अहिल्या के मुॅह उले के उले रही गे , अपने ह फेर हाथ ल झर्रावत केहे लागिस – हरहिंसा खाबे तेला खवइ कहिथे अउ उही हॅ अंग लागथे । हरहर – कटकट म काय सिध परही ।

अइ का होगेे परमिला आज कइसन गुसिया गे हावस वो ? गॅंुझियाये गाॅंठ परे फूचरा ल फरियावत अहिल्या हॅ पूछिस।

हालेके अहिल्या जानत हे के परमिला हॅ बिगर पूछे सबो बात ल उछरही । ओकर पेट म काॅही बातर नइ पचय। छेरी के मॅंुह त परमिला के मॅुह एके जान। तभो ले परमिला ल घलो तो अइसे लगना चाही के अहिल्या हॅ ओकर दुख-पीरा ल समझत – सरेखत हावय। अहिल्या के बात ह अभीन सिरायच नइ रिहिस हे –
काला बताबे ….एक ठन राहय तेला बतावॅव इहाॅं तो….. अइसे काहत परमिला फेर थोथना ल ओरमा दिस।

बइला ल धूरा पटकत देखके जइसे किसान के जी बमक जाथे तइसे कस परमिला के ओरमत थोथना ल देखके अहिल्या के जी हो गे रिहिस हे। फेर मन ल मारके उपरसाॅंसी लेवत कहिस – का करबे दीदी जिंहा चार ठन बरतन- भॅंड़वा मिलथे तिंहा ठिनिन -ठानन तो होबे करथे………..

परमिला बीचे म बात काटत कहिस -तभ्भो ले ,तभो ले। हमर घर तो बहुतेच हे। ………कुच्छूच बात नोहय।
हाथ ल झर्रारत आगू कहिस – ओकर जउंहर होवय नाती टूरा हॅं अपन ददा संग खाए बर बइठे रिहिसे। घेरी भेरी अपन दाइ जघा -आलू दे ! आलू दे कहिके माॅगय ।

ओकर आलू मॅंगइ ल देखके मही हॅ कहि परेंव – अइ आलू दे दे न वो कब के आलू आलू रटन धरे हे। ओकर थारी म भाॅटे -भाॅटा दिखत हे अउ मोर म आलूच- आलू ल भर दे हस। पीलखाहा निपोर हॅ मीठावत हे न काॅंही।
परमिला हाथ ल हला -हलाके आॅखी ल मटकावत तो गोठियाते रिहिस हे। अब मुॅह ल घलो दू बीता फार दिस अउ कहिस – हाय राम ! बहू के जबान ल तो देख , मोरे बर बघवा कस बरनियागे बाइ । मोही ल कहे लगिस -मैं छाॅंट छाॅंटकेे परोसत हॅंव का ? फोकटे फोकट मोर उपर लाॅंछन लगावत हस।

अब परमिला अपन औकात म आ गे। दाॅत ल पीसत , थूॅक ल छटकारत उल्टा अहिल्या ल पूछे लगिस -अब बता तैं भला ? अपन दाइ ददा ल अइसने जुवाब देवत रिहिस होही ?…… उहू टूरा के चाल ल तो देख। ओकरे आघू म अतेक बड़ बात होगे फेर एक भाखा बहू ल नइ बरजे सकिस। तैं कालेचुप राहा वो। दाई हॅ बने काहत हे। अतका तो कहि सकत रहिस हे। फेर काबर बोलय -ओला तो मोहनी- थोपनी देके मोह डारे हे राॅंडी़ कलजगरी हॅं।
…………………………. ।




आज ओकर ससुर जीयत रहितिस त का होतिस जानथस ?’’बखेड़ा खड़ा हो जातिस बखेड़ा’’ परमिला खुदे सवाल करथे अउ खुदे जुवाब देथे। अहिल्या कभू मुड़ी ल डोलावय। कभू हॅू -हॅू काहय। त कभू मुॅह ल ’’चक-चक’’ बजा देवय। जइसे जम्मो के जम्मो बिपत हॅ ओकरे मुॅड़ म आके खपला गे हे।

थोरिक थिराके परमिला के एक्सप्रेस फेर दउड़े लागिस। कहिस – मोर चलतिस त मैं एकर कदाप मुॅह नइ देखतेंव वो। कहाॅं कहाॅं के नीच घरायन म बिहा परेन। मै पचासो पइत ओकर ददा ल बरजे हौं। आरा -पारा , तीर -तखार ल बने पूछ -गौछके ,देख- परखके माॅगबे न कहिके। उहू मुड़पेलवा हॅं अपनेच मन के करिस। उहेंच जाके झपाइस। मोर एको नइ चलन दिस । अपन हॅ तो जुड़ा सितरा के बनौका ल बना लिस। मैं हॅ फाॅदा म परगेंव ।

उही होइस जेकर अनमान अहिल्या ल पहिलीच ले रहिस हे। गोठियाते -गोठियावत परमिला बोमफार के रोये लगिस। रोवत -रोवत परमिला अपन जम्मो पुरखाके सबो गुनदोस ल फलफल -फलफल बाॅच के ओसा तको डारिस। ले दे के सांत होइस तब जाके अहिल्या के जी जुड़ाइस।

अहिल्या जानथे के बात ल बतगंड़ बनाये के परमिला के आदतेच हे। तभो ले ओकर खाॅध म हाथ ल मड़ाके सहिलावत कहिथे – आजकाल के बहू मन ल का कहिबे बहिनी। कहिबे तेनो अनभल हे। नइ कहिबे तेनो अनभल ।

परमिला ल लागे लगिस के अहिल्या हॅ घलो मोर दुख म बियाकुल हे। ओकर ताव थोरिक जुड़ाय लगिस । जम्मो भड़ास निकल गे। मुड़ी ल नवाये सोचे लगिस। अहिल्या समझ गे के परमिला के नारी जुड़ा गे। अब लोहा म पानी मारे के बेरा आ गे।

कहिथे -बड़ेमन ल घुरूवा होयेच बर परथे परमिला । नान -नान बात म किटिर -काटर होवत रहिबो त परवार हॅ कइसे चलही। गलती काकर से नइ होवय। लइका हॅ जाॅंघ म हग देही त जाॅंघे ल थोरे काट के फेंक देबे। धोये पोंछे बर तो हमीच ल परही न !

अहिल्या जानथे के कहॅू मैं थोरको खसलेंव ताहेंन परमिला मोरे उपर चढ़ बैठही। परमिला ल समझाना माने तलवार के धार म रेगना आय।

बात ल साधत कहिस -कोन ल का कहिबे बहिनी ! हमरे घर हमरे दुवार । बनही त हमरे बिगड़ही त हमरे। कोनो हॅ अपन मन म काॅंही राखय। हमी ह अपन फरज ल निभा लेथन सोचके बेटा ल बेटा अउ बहू ल बेटी ले दूसर भाखा नइ काहन। लइका मन संग खेल खाके दुख पीरा ल बिसरा लेथॅन । फेर हाॅ ! गउकीन इमान से परमिला तैं पतिया चाहे झन पतिया । जेेन दिन ले मै बहू ल बेटी कहे ल धरे हॅव वो दिन ले सास -बहू के बीच के डबरा पटा गे हे। बेटी कस मया – दुलार ल पाके मोर सबिता हॅ बेटी ले जादा मोर हियाव करे लगे हे। मोला काॅंही के संसो फिकर नइहे। मै मन म सोंचे -सपनाये नइ राहव आगू – आगू ले मोर साध पूरा हो जाथे।

अतके ल सुनिस अउ परमिला कुला ल झर्रावत उठके मुसकावत चलते बनिस। जना -मना कोनो खचित बूता – काम के सुरता आगे।

अहिल्या सोचत देखते रहिगे -बोकबाय के बोकबाय ।

धर्मेन्द्र निर्मल
9406096346
🔊 ये रचना ला सुनव

The post कहानी : मंतर appeared first on गुरतुर गोठ Chhattisgarhi.

शीत बरसावत आवय जड़काला
सोनहा बाली म मोती कस माला
पिंवर होगे पहिरे हरियर ओनहा
जइसे दुलहिन बिहाव के ओढ़े दुशाला!

खेत ह लागे भांय भांय सांय सांय
घर जइसे बेटी के छोड़त अंगना
उछाह उछलय कोठी कोठार म जस
कुलकत मीत मया के जोरत बंधना!

मने मन म हांसी एक मन आगर
जुड़ावय शीतलावय थोकन जांगर
दान पून करके चुकता पउनी पसारी
नाचत बजावत सबझन मांदर!

बेरा हे गीत ल गाय के संगी
दुख पीरा ल भूलाय के संगी
तन संग मन ल फरियर करके
जुर मिल तिहार मनाय के संगी

परब परकीति परेम पुजारी गा
बात एकेच ए नोहे दुधारी गा
दुख लेके सुख सोहर बांटे सदा
भर भर देवय सब ल माटी महतारी गा!

ललित नागेश
बहेराभांठा(छुरा)
४९३९९६
🔊 ये रचना ला सुनव

The post कविता : बेरा हे गीत गाय के appeared first on गुरतुर गोठ Chhattisgarhi.

बिहनिया ले डोकरा बबा कुडकुडावत हे
चिरइ चिरगुन पंख फड़फडावत हे
बडे बिहनिया झन उठीहा संगी
अब के जाड़ हा जनावत हे
दाई हा पनपुरवा बनावत हे
ददा मंद मंद मुचमुचावत हे
एति तेति झन गिंजरिहा संगी
अब के जाड़ हा जनावत हे
डोकरा बबा बिडी सुलगावत हे
डोकरी सरसों तेल कडकावत हे
आगी के तिर ले झन उठिया हा संगी
अब के जाड़ हा जनावत हे
भइसी बइठे पगुरावत हे
राउत ला भइसी लतीयावत हे
जाड मा झन नोहावा संगी
अब के जाड़ जनावत हे
भउजी लइका ला खिसियावत हे
लइका माटी मा नोहावत हे
कातिक नोहाय झन जावा संगी
अब के जाड़ हा जनावत हे

कोमल यादव
मदनपुर, खरसिया
🔊 ये रचना ला सुनव

The post जाड़ हा जनावत हे appeared first on गुरतुर गोठ Chhattisgarhi.

अभी हमर कोति जंगलिया हाथी बनेच दंदोरे हे, धान चंउर ल बनेच रउंद दारे हे, उही दुख ल गाय हंव। सरकार ह सीखे पढ़े (परसिक्छत) हाथी ल दक्छिन भारत ले लाने बर लाखों खरचा करत हन कहिथे, फेर का काम के? ‘पहुना परदेशिया’ उही हाथी बर लिखे हंव! रंग महल राज्योत्सव तनी इशारा हे!

हाथी हाथी हाथी बज़े बड़े अउ नानकुन हाथी
झिंकय पुदगय टोरे ठठाये आगु म जेला पातिस
आए जंगलिया हाथी

कहां ले आए अटकत भटकत ढेला पथरा हपटत
हाथी ह फेर हाथीच आय बइठगे त घुचथे लटपट
मेला मड़ई कस हुजुम होगे जेति जेति जातिस!
आए….,

छर्री दर्री कुंदरा कुरिया उझारय परवा छानी
नइ गुनय थोरको गाड़ी मोटर करय चानी चानी
गदबद पएर बिछे कस खेत देख करेजा फाटिस!
आए…..,

बन बगइचा के रहईया खेत डगर नई सुहावय न
जिंहा के जीव उंहे भाथे जुरमिल जम्मो पहुंचावय न
कहां हे वो “पहुना परदेशिया” कोनो अतापता बतातिस
आए….,

अपन पीरा ल अपने जानही बिन मुहु कोन ल बताही
‘वन अधिकार’ म कांदा कुसा जरगे,का ला वो खाही
चारा पानी उंहे मिले ले कहां एति सोरियातिस
आए….,

राजा माते रंग महल मुड़ पीरा म मरत हे परजा जी
मौसम हाथी ‘दुख म दोहरा’ नूनहा जरत हे करजा जी
“आंसू देख सुते नइ सकंव” कहईया ल सुरता देवातिस
आए…..!!!

ललित नागेश
बहेराभांठा(छुरा)
४९३९९६
🔊 ये रचना ला सुनव

The post छत्तीसगढ़ी गीत ‘हाथी हाथी’ appeared first on गुरतुर गोठ Chhattisgarhi.

पियंर पियंर डोली खार
धान बाली लहलहावत हे
लुए टोरे के दिन आगे
मांथ ल नवावत हे

रापा धरके कांदी छोले
बियारा ल चतरावत हे
जुड़ा ड़ाढ़ी सुमेला बंडी
बईलागाड़ी ल सम्हारावत हे

पेरा पुरा के पैरा डोरी
बर बरके बनावत हे
धान लुए बर हंसिया,बेठ
लोहार कर पजवावत हे

पात धरके चापे चाप
करपा ल मढ़ावत हे
थके मांदे निहरे निहरे
कनिहा ल सोजियावत हे

पेरा पुरा के पैरा डोरी
बीड़ा बीड़ा बांधत हे
मेड़ म बईठके बीड़ी पियत
सुसती धपकी मारत हे

डबल टिबल बोझा बिड़ा
सुर मुड़ी म डोहरावत हे
उल्ला धुरहा देख देखके
गाड़ा बईला म भरवावत हे

बईला गाड़ी टेक्टर टेक्टर
रवने रवन रेंगावत हे
धरे तुतारी कोड़ा लउंठी
ओहो तोतो चिल्लावत हे

कोठार बियारा खरहि खंजाय
लएन वार डोरी छोरावत हे
सुल्लु ढ़ेबर्रा गाभा भरके
बड़े बड़े खरहि रचावत हे!!

मयारुक छत्तीसगढ़िया
सोनु नेताम माया
रुद्री नवागांव धमतरी
९८२७३५६०१२
🔊 ये रचना ला सुनव

The post लुए टोरे के दिन आगे appeared first on गुरतुर गोठ Chhattisgarhi.

‘स्वच्छ भारत मिशन’ के मनमाने सफलता ल देख के मोर मन म एक ठिन सपना आत हे ,हमर सरकार ल अवईया नवा बछर ले ‘मंद छोड़ो अभियान’ शुरू कर देना चाही।उदघाटन घलो उंकरे ले होय त अउ बढ़िया। कम से कम यहू तो पता चलही कोन कोन सियान मन मंद मतवारी करत रिहीन। फेर का करबे सपना त सपना आय रे भई!
पाछु तीन चार बछर ले देखत आत रेहेन गांव गांव म रोजिना छापा मरई ,कोचिया बिल्कुलेच नइ होना।दू बोतल तीन बोतल एकाध गिलास देंवता धामी म तरपे बर राखे ह घलो गिनती म आ जाय ,अउ जम्मो ल ओलियई बुता करंय।फेर ए साल छापा मरई बंद ,सरकार खुदे बेचत हे मंद,त कोनेच करही तंग,ले ले के एकर गंध,करत हे लंद फंद। कोचियई धंधा नी होना चाही काहंय अब अपने मन कोचिया बनगे।
ए नीशा पानी के सुभाव ल तो सबो जानतेच हव जब चघे रहिथे तब मनखे अपन ल “द ग्रेट खली” ले कम नइ समझंय, “मेरे सामने….., मै वो….., तु मुझे….,” छाती पीट पीट के परबचन झाड़थे अउ निमगा मे राधे श्याम नी बोले। फेर भई जब अपन ताकत के जानबा होथे त ओकर परीक्छन तो जरूरी आय,त कपड़ा लत्ता फेंक ,गली मे नाच,परोसी संग हाथ पांव के मेल जोल,घर मे लोग लईका ल ताकत देखा,हंड़िया पटक,लट्टु फोर ,शीशी कचार!




आज काली कंहू मेर होय शीशी के कांच बगरे दिख जाथे। अईसनेच मंधवा मन के फोरे बगराए कांच हमर परोसी सुरेश पांव म गड़े रिहीस तीन महीना ले घर ले नइ निकलिस बपरा ह। पाछु महीना सिरी बुधराम गुरूजी के फटफटी ह कांचे म फुटे रिहीस,ढुलात ढुलात एक कोस लेग के बनात ले देरी होगे। उही दिन बड़े साहब मन स्कुल के दउरा करिन ,गुरूजी गैरहाजिर कारण बताओ नोटिस निकल गे संगे संग निलंबन के आडर ।आजेच थानू कका बिहनिया तरिया म दतवन करे बर अइस,जोहार भेंट के पाछु पुछ परेंव का बुता चलत हे कहिके?गुसियाहा बरन ले बतइस- “टेक्टर के बड़े चक्का ल हेरत रेहेंव,नारायण के खेत म रचाय खरही ल मिंजे बर थेसर लेगत रेहेंव कोन मंधवा बीयर पी के शीशी ल फेंक दे रिहीस हे, चक्का जइसे परीस शीशी फट ले फूटिस अउ भस ले गोभा गे ; जम्मो हवा फसफस ले .., अब का बताबे?”
संगवारी हो अइसने हमर आघु पीछु कतकोन ठिन घटना दुर्घटना होवत हे ए कांच बगरे ले ।हमर बाताबरण ल सफ्फा रखे बर का सरकारेच के ठेका हे?गांव म पारा टोला म उंहेच के रहईया मन करथे अउ सोंचथे सरकार सफई करवाही!सरकार के दिन ले ए पारा वो पारा बाहरत किंजरही?के जगा के शीशी कांच ल बिनत बईठे रही?प्रधानमंत्री हर गांव म तो नइ जा सके न भई! फेर हर गांव म एक प्रधानमंत्री जरूर बन सकत हें, जेन ह अपन तीर तखार ल स्वच्छ बनाय के जिम्मा उठा सकत हे!अउ एक गांव ल साफ रखे के फल देश के प्रधानमंत्री के डाहर ले करे काम के फल के बराबर माने जही!




फेर अघवाय कोन? का मिलही हम ला? आज काली आंखी ह अइसन होगे हे कि जेती देखबे फायदा फायदा दिखना चाही,बिन फायदा के कतको बढ़िया काम सुंघे नही।कई झिन कहिथे एकर बर कानून बनना चाही ,नियम कायदा बने ले सब लइन रद्दा म आ जही ।अरे कतका कानून ल का करहू ? हमर मेर अतका अकन कानून परे हे जेकर पालन हो जाय त गांव राज का कबे ए देश साल भर म संसार भर म अघुवा बन जही ।लेकिन नही ,जब तक हम ल कोनो हुदरही नही ,कोचकही नही तब तक जिमेदारी के मोटरा ल नइ उठान ।पाछु बखत एक ठिन नियम निकालिस – जम्मो फटफटी चलईया ल मुड़ी म हेलमेट लगाना घातेच जरूरी हे! चार दिन सब फटफटी चलईया के मुड़ी चिक्कन!तहान ले …,फेर उही कहानी ।कोनो तो कोचकईया नइये ?कोनो चालान कटईया नइये? जतेक हमर उमर बाढ़त जात हे हम ओतकेच अपन ल गियानी धियानी बिचारवान समझत जात हन। जब अतका जागरूक होगे हन त चौकी म पुलिस देखे के पहिली हेलमेट काबर नी लगान?डाहर बाट म कांच बगराये ले मजा आथे? दू चार रुपिया के के जुरमाना भरे के अगोरा म रहिबो त का जानथस ऊपर वाला नगतेच रुपिया के चालान बना दिही?वो समे अबड़ देरी हो जाय रही!

ललित नागेश
बहेराभांठा(छुरा)
४९३९९६
🔊 ये रचना ला सुनव

The post मन के बिचार appeared first on गुरतुर गोठ Chhattisgarhi.

परिया परगे धनहा भुईयां,
दुख के बादर नई भागय रे भैय्या I
काय तिहार अऊ काला जोहर,
पेरावत हाबन सालों साल I

ऐसो के किसानी जीव के काल,
परगे संगी जब्बर अकाल I
नांगर ओलहा के टूटगे फेर,
काय तिहार अऊ काला जोहर I

का संझा का बिहनिया,
ताकते रहिथन मंझनिया,
सुन ले गोठ ग सियनहा I
नेता बनके ससुरा सियार होगे न,
ऐकरे मनके जुरयई बड़का तिहार होगे न I

तीजा पोरा अऊ दसेरा देवारी,
जुरियावन सबो खैईरका दुवारी
खेलन होरी मा रंग गुलाबी I
अईसन कतिहा बोनस तिहार होथे न,
नेता मनके जुरयई बड़का तिहार होगे न I

खनती कोड़ईया संगी साथी,
बटकी म बासी, बन म काशी I
बंभरी फुल के खिनवा सोनहा,
जीवरा जुड़ावय देखन बिहनहा I

परब परब नई लागय मितान,
मेला मड़ई होगे सबो सियान I
चुनई लख्टीयाथे त जीव के जंजाल होथे न,
नेता मनके जुरयई बड़का तिहार होथे न I

विजेंद्र वर्मा अनजान
नगरगाँव (जिला-रायपुर)
🔊 ये रचना ला सुनव

The post बड़का तिहार appeared first on गुरतुर गोठ Chhattisgarhi.

धनी घर के ऐ चातर करइया, खेत बेंचके ऐ नौकर बनइया
तोर किसानी गंवावथे रे !
तोला लाज कइसे नइ लागे ?
सरकारी चांऊर म मेछरावथस, चेपटी पी के पटियावथस
तोर जुवानी घुनावथे रे !
तोला लाज कइसे नइ लागे ?

करिया पूंजी के घोड़ा दंउड़थे, देसराज म मुनादी होगे
खेत-खेत म पलांट बइठावथे, पूंजीपति बर मांदी होगे
अन्न उपजइया किसान बपरा ह, देख तो कचरा-कांदी होगे
पुरखऊती बिगाड़ के गुलामी करइया
खेत बिगाड़ के सियानी करइया
तोर सियानी घुनावथे रे !
तोला लाज कइसे नइ लागे ?

धान कटोरा म राखड़ भरगे, साल के साल दुकाल होवथे
भाई के रकत भाई बोहावथे, दाई के अंचरा लाल होवथे
घर फूंक के जग उजरइया ह, कला करके कंगाल होवथे
नित सिंगार अतर म बूड़े रहइया,
कजरा-गजरा नित लिखइया
तोर लिखानी भुलरावथे रे !
तोला लाज कइसे नइ लागे ?

छत्तीसगढ़िया बढ़िया कहिके, कपटी पांव पसार धरे
चिलवा, गिधवा नित बिचारथे, किसान खेत म बैपार धरे
तभे किसान ल कोढ़िया करके, किसानी के बंठाधार करे
मरे बिहान हे अइसन सियानी म,
हमर रतन बेटा रमे हे मितानी म
तोर मितानी घुनावथे रे !
तोला लाज कइसे नइ लागे ?

लोकनाथ साहू ललकार
बालकोनगर, कोरबा (छ.ग.)
मोबाइल- 9981442332
🔊 ये रचना ला सुनव

The post तोला लाज कइसे नइ लागे ? appeared first on गुरतुर गोठ Chhattisgarhi.